پاکستان اور بھارت کے درمیان جاری جنگ کے دوران گمراہ کُن پروپیگنڈا بے نقاب ہونے پر سوشل میڈیا پلیٹ فارم ’ایکس‘ بھی بھارتی جارحیت کی زد میں آگیا۔

ذرائع کے مطابق بھارتی میڈیا نے ہمیشہ گمراہ کن پروپیگنڈا کرتے ہوئے صحافتی اقدار کو پامال، مودی کی نفرت انگیز سیاست اور جھوٹ کا پرچار کیا، تاہم پہلگام فالس فلیگ بے نقاب ہونے اور سوشل میڈیا پر ردعمل سے بھارتی حکومت شدید بوکھلاہٹ کا شکار ہے۔

ایکس انتظامیہ کا کہنا ہے کہ مودی حکومت نے سوشل میڈیا پلیٹ فارم ایکس کو 8000 سے زائد اکاؤنٹس بلاک کرنے کا ایگزیکٹو آرڈر جاری کردیا، جس میں بین الاقوامی میڈیا اداروں اور سوشل میڈیا ایکٹوئسٹ کے اکاؤنٹس پر بھی پابندی شامل ہے۔

انتظامیہ کے مطابق زیادہ تر بھارتی احکامات میں مواد کی وضاحت اورقانونی جواز فراہم نہیں کیا گیا، بھارت نے یہ نہیں بتایا ان اکاؤنٹس نے کون سے بھارتی قوانین کی خلاف ورزی کی ہے۔

ایکس انتظامیہ نے مزید کہا کہ کثیر تعداد میں اکاؤنٹس ایسے ہیں جن کو بند کرنے کی کوئی وجہ نظر نہیں آتی، اکاؤنٹس کی مکمل بندش آزادی اظہار رائے پر حملہ ہے، ایکس تمام قانونی راستے تلاش کررہا ہے، صارفین عدالت سے رجوع کریں۔

سیاسی ماہرین کا کہنا ہے کہ بھارتی حکم نامے ان اکاؤنٹس کے خلاف ہیں جو بھارتی حکومت اور فوج کے جھوٹ بےنقاب کرتے ہیں، اکاؤنٹس کی بندش سے واضح ہے کہ مودی پہلگام فالس فلیگ بے نقاب ہونے پر شدید بوکھلاہٹ کا شکار ہے، تاہم اکاؤنٹس کی بندش سے سب سے بڑی نام نہاد جمہوریت بھارت کا اصل چہرہ بے نقاب ہو گیا ہے۔