پاکستان کی جانب سے بھارت کی حالیہ جارحیت کے خلاف جوابی کارروائیوں کا سلسلہ جاری ہے، جس میں اب تک اہم عسکری اور تکنیکی اہداف کو کامیابی سے نشانہ بنایا گیا ہے۔

سیکیورٹی ذرائع کے مطابق پاکستان ایئر فورس کے JF-17 تھنڈر طیارے نے آدم پور میں بھارت کے جدید S-400 ایئر ڈیفنس سسٹم کو کامیاب کارروائی میں تباہ کر دیا ہے۔ اس سسٹم کی مالیت تقریباً 1.5 بلین ڈالر بتائی جاتی ہے۔

ذرائع نے یہ بھی تصدیق کی ہے کہ بھارتی فضائیہ کا سورت گڑھ ایئر فیلڈ بھی پاکستانی کارروائی میں تباہ کر دیا گیا ہے، جس سے بھارت کے شمالی فضائی دفاع کو شدید دھچکا پہنچا ہے۔

دفاعی کارروائیوں کے ساتھ ساتھ پاکستان نے سائبر میدان میں بھی مؤثر جوابی اقدام اٹھایا ہے۔ پاکستانی سائبر اٹیک ٹیم نے بھارت کی مہاراشٹرا اسٹیٹ الیکٹرسٹی ٹرانسمیشن کمپنی لمیٹڈ (MSETCL) پر کامیاب حملہ کرتے ہوئے ادارے کے تمام کمرشل اور گھریلو میٹرز کا ریکارڈ حذف کر دیا۔

سائبر حملے کے نتیجے میں مہاراشٹرا بھر میں بجلی کی مکمل بندش واقع ہوئی، جس سے صنعتی، تجارتی اور رہائشی سرگرمیاں مفلوج ہو کر رہ گئیں۔

ذرائع کا کہنا ہے کہ یہ سائبر حملہ بھارت کو اس کے جارحانہ اقدامات کا غیر روایتی اور جدید محاذ پر مؤثر جواب ہے۔

الفَتح میزائل کی لانچ: شہید بچوں کے نام سے منسوب

سیکیورٹی حکام کے مطابق پاکستان نے “الفَتح” میزائل بھی فائر کیا ہے، جو ان بچوں کے نام پر لانچ کیا گیا ہے جو بھارتی حملوں میں شہید ہوئے۔ یہ میزائل اپنے جدید نیویگیشن اور ہدف کو درست نشانہ بنانے کی صلاحیت کے باعث ایک مؤثر دفاعی ہتھیار مانا جاتا ہے۔