پاک بحریہ کا جہاز پی این ایس حنین علاقائی بحری سلامتی کے مشن ریجنل میری ٹائم سیکیورٹی پٹرول (RMSP) پر تعیناتی کے دوران سلطنت عمان کی بندرگاہ پر لنگر انداز ہوا، جہاں عمانی بحری حکام نے جہاز کا پرتپاک استقبال کیا۔

دورے کے دوران پی این ایس حنین نے رائل نیوی آف عمان کے جہاز خصب (RNOV KHASSAB) کے ساتھ دو طرفہ بحری مشق میں شرکت کی۔

اس مشق کا مقصد دونوں ممالک کی بحری افواج کے درمیان باہمی تعاون کو فروغ دینا، مشترکہ آپریشنز میں ہم آہنگی پیدا کرنا، اور بحر ہند کے خطے میں بحری سلامتی کو یقینی بنانا تھا۔

دورے کے دوران کمانڈنگ آفیسر پی این ایس حنین نے رائل نیوی آف عمان کے اعلیٰ حکام سے اہم ملاقاتیں کیں، جن میں دفاعی تعاون، خطے میں سیکیورٹی چیلنجز اور باہمی دلچسپی کے امور پر تبادلہ خیال کیا گیا۔

کمانڈنگ افسر نے چیف آف دی نیول اسٹاف، ایڈمرل نوید اشرف کی جانب سے عمانی عوام اور مسلح افواج کے لیے نیک تمناؤں اور خیرسگالی کا پیغام بھی پہنچایا۔

پاک بحریہ باقاعدگی سے ریجنل میری ٹائم سیکیورٹی پٹرول کے تحت اپنے جہازوں کو مختلف بندرگاہوں پر تعینات کرتی ہے تاکہ خطے میں امن، استحکام اور میری ٹائم پارٹنرشپ کو فروغ دیا جا سکے۔

پی این ایس حنین کا یہ دورہ دونوں برادر ممالک کے درمیان دیرینہ دوستانہ تعلقات، باہمی اعتماد اور دفاعی تعاون کو مزید مضبوط بنانے کی سمت ایک اہم قدم قرار دیا جا رہا ہے۔