انقرہ: ترکیہ کے صدر رجب طیب اردوان نے کہا ہے کہ اچھے اور برے وقت میں ہمیشہ پاکستان کے ساتھ کھڑے رہیں گے۔

ایکس (سابقہ ٹوئٹر) پر جاری اپنے پیغام میں ترکیہ کے صدر صدر اردوان نے وزیراعظم پاکستان شہباز شریف کو “قیمتی بھائی” کہتے ہوئے مخاطب کیا۔

ترک صدر رجب طیب اردوان نے وزیرِاعظم شہباز شریف کے نام ایک محبت بھرے پیغام میں پاکستان کے لیے اپنی دلی وابستگی اور حمایت کا اظہار کیا ہے۔

صدر اردوان نے کہا کہ ترکیہ اور پاکستان کے درمیان تعلقات اخوت، بھائی چارے اور باہمی اعتماد کی ایک روشن مثال ہیں، یہ وہ برادرانہ تعلق ہے جو دنیا کے چند ہی ممالک کو نصیب ہوتا ہے۔

اپنے پیغام میں صدر اردوان نے کہا کہ آپ کے ذریعے میں اپنے دوست اور بھائی پاکستان کو دلی محبت کے ساتھ سلام پیش کرتا ہوں۔

ترکیہ کے صدر نے پاکستان کی پالیسیوں کی تعریف کرتے ہوئے کہا کہ انقرہ، اسلام آباد کے امن، استحکام اور ضبط و تحمل کو بے حد اہمیت دیتا ہے۔

انہوں نے پاکستان کی ان کوششوں کو بھی سراہا جو تنازعات کے حل کے لیے مکالمے اور مصالحت کو ترجیح دیتی ہیں۔

صدر اردوان نے دوٹوک انداز میں کہا کہ ہم اچھے اور برے وقت میں ہمیشہ پاکستان کے ساتھ کھڑے رہیں گے، جیسے ماضی میں ساتھ دیا، ویسے ہی مستقبل میں بھی ترکیہ پاکستان کے شانہ بشانہ رہے گا۔

اپنے جذباتی پیغام کے اختتام پر انہوں نے مزید لکھا کہ پاکستان-ترکی دوستی زندہ باد!”