پاکستان کی خاتون پولیس افسر انعم خان نے عالمی انویسٹی گیشن ایوارڈ جیت لیا، تقریب کا اہتمام دبئی میں کیا گیا تھا۔

تفصیلات کے مطابق صوبہ پنجاب سے تعلق رکھنے والی پولیس افسر انعم خان سرگودھا پولیس میں بطور تحیقیقاتی افسر اپنی خدمات سرانجام دے رہی ہے۔

انعم خان کو دبئی میں منعقدہ ورلڈ پولیس سمٹ ایوارڈز 2025 میں “ایکسلیس اِن کرمنل انویسٹی گیشن” کے عالمی ایوارڈ سے نوازا گیا ہے۔

یہ ایوارڈ دبئی پولیس کی میزبانی میں ایک شاندار تقریب کے دوران پیش کیا گیا، جس میں دنیا کے 90 سے زائد ممالک سے پولیس سربراہان اور سکیورٹی ماہرین نے شرکت کی۔

یہ بھی پڑھیں:  ایس ایس پی رفعت بخاری کو ایکسیلنٹ ان پرفارمنس ایوارڈ سے نواز دیا گیا

پاکستانی پولیس افسر انعم خان کو دیا گیا یہ عالمی اعزاز ان کی غیر معمولی تفتیشی صلاحیتوں اور پیشہ ورانہ مہارت کا اعتراف ہے۔

انعم خان کو یہ اعزاز پنجاب کے دو اہم قتل کیسز کو کامیابی سے حل کرنے پر دیا گیا۔

پہلے کیس میں، انعم خان نے 12 سالہ گھریلو ملازمہ عائشہ بی بی کے قتل کی تفتیش کی، جسے بے دردی سے قتل کر دیا گیا تھا۔ ان کی نگرانی میں سرگودھا پولیس نے محض 72 گھنٹوں میں ملزمان کو گرفتار کر لیا تھا۔

دوسرے کیس میں، انعم خان نے نوجوان محسن کے قتل میں ملوث افراد کی گرفتاری صرف 24 گھنٹوں میں ممکن بنائی تھی۔ انعم خان کو پنجاب پولیس کی جانب سے تعریفی اسناد اور اعزازات دیے جاچکے ہیں۔

تقریب کے منتظمین کے مطابق ، انعم خان کا انتخاب دنیا بھر سے موصول ہونے والی 900 سے زائد تحقیقاتی رپورٹس کی جانچ پڑتال کے بعد ہوا ہے جو انعم خان کی تحقیقاتی صلاحیتوں کو ظاہر کرتا ہے۔

ایوارڈ حاصل کرنے کے بعد دبئی میں گفتگو کرتے ہوئے انعم خان نے کہا کہ “یہ پاکستان اور پنجاب پولیس کے لیے ایک قابل فخر لمحہ ہے۔

انعم خان نے کہا کہ میرے لیے اعزاز کی بات ہے کہ میں اپنے ملک کی نمائندگی کر رہی ہوں اور یہ ثابت کر رہی ہوں کہ ہم نہ صرف امن و امان برقرار رکھ سکتے ہیں بلکہ عالمی معیار کی پولیسنگ کے قابل بھی ہیں۔

بین الاقوامی ماہرین کے مطابق، انعم خان کیلئے عالمی پولیس ایوارڈ پاکستانی پولیس فورس کی بڑھتی ہوئی پیشہ ورانہ مہارت کو ظاہر کرتی ہے۔