لاہور: وزیراعلیٰ پنجاب مریم نواز شریف نے صوبے میں خطے کی سب سے بڑی اور جدید ترین کلائمیٹ آبزرویٹری کے قیام کی منظوری دے دی ہے۔

 اس کے ساتھ ساتھ ایک جدید سائنسی تحقیقی مرکز کے قیام کا فیصلہ بھی کیا گیا ہے، جو ماحولیاتی تبدیلیوں کی نگرانی اور پیشگوئی میں اہم کردار ادا کرے گا۔

یہ فیصلہ ایک اعلیٰ سطحی اجلاس میں کیا گیا جس کی صدارت سینئر وزیر مریم اورنگزیب نے کی۔

 اجلاس میں آبزرویٹری کے قیام سے متعلق بجٹ، زمین اور آلات کی فراہمی پر مشتمل فزیبلٹی پلان پیش کیا گیا جبکہ یونیورسٹی آف انجینئرنگ اینڈ ٹیکنالوجی (یو ای ٹی) لاہور نے اپنی تکنیکی رپورٹ بھی اجلاس میں جمع کرائی۔

کلائمیٹ آبزرویٹری کے اہم خدوخال

آبزرویٹری پنجاب پلاننگ اینڈ ڈویلپمنٹ ہاؤس میں قائم کی جائے گی، منصوبے کے لیے درکار زمین کا قبضہ حاصل کر لیا گیا ہے اور عمارت ای آئی سی ٹی میں تعمیر کی جائے گی۔

آبزرویٹری میں جدید خودکار کمیونیکیشن اور لنکج سسٹم نصب ہوگا اور جی آئی ایس لیب، سیکٹورل انٹرفیس سسٹم، ڈیٹا ہب اور ایم آر آئی نظام کا بھی قیام عمل میں لایا جائے گا۔

ماحولیاتی ماہرین کی تیاری اور عالمی اشتراک

اجلاس میں بتایا گیا کہ آبزرویٹری کے تحت انٹرن شپ پروگرام کے ذریعے مختلف شعبوں میں ماحولیاتی ماہرین تیار کیے جائیں گے، بین الاقوامی سطح پر ماحولیاتی معلومات کے تبادلے کے لیے بھی یہ ادارہ ایک اہم مرکز بنے گا۔

اس کے علاوہ ایک جدید ڈیٹا آرکائیو سسٹم، کوآرڈینیشن یونٹ اور انٹرنیشنل کمیونیکیشن سیل بھی قائم کیا جائے گا۔

اسٹریٹجک اہمیت اور پالیسی سازی میں کردار

ماہرین کا کہنا ہے کہ اس جدید ادارے سے نہ صرف موسمیاتی خطرات کی بروقت پیشگوئی ممکن ہو سکے گی بلکہ حکومتی پالیسی سازی کے لیے ٹھوس ڈیٹا بھی دستیاب ہوگا۔

اجلاس میں یہ بھی طے پایا کہ ادارے کو جدید مینجمنٹ ماڈل کے تحت چلایا جائے گا جبکہ سمارٹ اسٹرکچر کے لیے اسمارٹ آرگینوگرام تشکیل دینے کی ہدایت دی گئی۔

اس موقع پر سینئر وزیر مریم اورنگزیب نے کہا کہ وزیراعلیٰ مریم نواز شریف کی قیادت میں ماحولیاتی خطرات سے نمٹنے کے لیے ایک جامع اور قابلِ عمل پلان ترتیب دیا جا چکا ہے اور کلائمیٹ آبزرویٹری کا قیام اس سمت ایک بڑا سنگِ میل ثابت ہوگا۔