نئی دہلی: بھارتی فوج کی تذلیل پر مودی حکومت کو ریٹائرڈ افسران کا سخت ردعمل۔ آپریشن بنیان مرصوص میں ناکامی پر وزیروں کی ہرزہ سرائی، فوج کے دفاع میں سابق افسران کا احتجاج۔

آپریشن بنیان مرصوص میں ناکامی کے بعد بھارتی فوج پر تنقید، مودی حکومت کی خاموشی پر شدید ردعمل سامنے آگیا۔ انتہا پسند بھارتی وزراء اور ریٹائرڈ فوجی افسران کے درمیان شدید لفظی جھڑپ شروع ہوگئی ہے۔

آپریشن بنیان مرصوص میں ذلت آمیز شکست کے بعد بھارتی وزراء کی جانب سے فوج پر تنقید نے نئی بحث چھیڑ دی ہے۔ ذرائع کے مطابق مودی حکومت کے وزیروں نے فوجی ناکامی کا سارا ملبہ بھارتی فوج پر ڈالنا شروع کر دیا ہے۔

یہ بھی پڑھیں: بھارت پاکستان کے سامنے گھٹنے ٹیکنے پر مجبور

ریٹائرڈ فوجی افسران خصوصاً میجر جنرل (ر) شریواستو نے وزیروں کی فوج دشمنی پر شدید ردعمل دیا ہے۔ ان کا کہنا ہے کہ بھارتی فوج کی توہین کرنے والے وزیروں کو وزیر اعظم نریندر مودی برطرف کیوں نہیں کر رہے؟

مدھیہ پردیش کے وزیر وجے شاہ اور نائب وزیر اعلیٰ جگدیش دیوڈا کی جانب سے فوج مخالف بیانات پر میجر جنرل (ر) شریواستو نے کڑی تنقید کرتے ہوئے کہا کہ ’’فوج صرف بھارت ماتا کے سامنے جھکتی ہے، مودی جیسے سیاستدانوں کے قدموں میں نہیں‘‘۔

انہوں نے مزید کہا ’’مودی کے قدموں میں فوج کو جھکانے کا بیان شرمناک اور ناقابل قبول ہے‘‘۔

سابق فوجی افسران کا کہنا ہے کہ کرنل صوفیہ قریشی جیسے افسران بھارتی قوم کا فخر ہیں جن پر مودی حکومت کی خاموشی دراصل ان حملوں کی تائید ہے۔

یہ بھی پڑھیں: بھارتی فوج نے شکست تسلیم کرلی

ان کے مطابق جو وزیر فوج کی توہین کرے وہ قوم کا خادم نہیں بلکہ مودی کا ترجمان ہے۔

دفاعی ماہرین کا کہنا ہے کہ ’’آپریشن بنیان مرصوص میں شکست نے واضح کردیا ہے کہ بھارتی فوج صرف میڈیا پر طاقتور دکھائی دیتی ہے‘‘۔ ان ماہرین کا مزید کہنا ہے کہ مودی حکومت کا مقصد فوجی اداروں کو سیاسی غلام بنانا ہے جو کہ ایک خطرناک ایجنڈا ہے۔

ریٹائرڈ فوجی افسران کا کہنا ہے کہ مودی حکومت کی خاموشی یہ ظاہر کرتی ہے کہ وہ بھی فوج کی توہین میں برابر کی شریک ہے۔ ان کا کہنا ہے کہ بھارتی فوجی ادارے مودی کی غلامی کے لیے نہیں بلکہ قوم کے تحفظ کے لیے ہیں۔