اوگرا نے سوئی ناردرن اور سوئی سدرن کے لیے گیس نرخوں میں رد و بدل کی منظوری دے دی، حتمی فیصلہ وفاقی حکومت کرے گی۔

اسلام آباد: تفصیلات کے مطابق آئل اینڈ گیس ریگولیٹری اتھارٹی (اوگرا) نے مالی سال 2025-26 کے لیے سوئی ناردرن گیس پائپ لائنز لمیٹڈ (SNGPL) اور سوئی سدرن گیس کمپنی (SSGC) کے گیس نرخوں میں رد و بدل کی منظوری دے دی ہے۔

۔ اوگرا نے اپنی سفارشات پر مبنی سمری حتمی منظوری کے لیے وفاقی حکومت کو ارسال کر دی ہے، جس کے بعد باضابطہ نوٹیفکیشن جاری کیا جائے گا۔

اوگرا کی جانب سے جاری کردہ تفصیلات کے مطابق، سوئی سدرن کے لیے گیس نرخوں میں 103 روپے 95 پیسے فی ایم ایم بی ٹی یو کمی کی سفارش کی گئی ہے، جبکہ سوئی ناردرن کے لیے 116 روپے 90 پیسے فی ایم ایم بی ٹی یو اضافے کی تجویز دی گئی ہے۔

مزید پڑھیں: اوگرا کی غیرلائسنس یافتہ ایل پی جی باؤزرز کے لئے آخری وارننگ جاری

اوگرا کے مطابق، ایس این جی پی ایل (سوئی ناردرن) کے نرخوں میں اضافے کی بنیادی وجہ ری-گیسیفائیڈ لیکویفائیڈ نیچرل گیس (RLNG) کی درآمد میں اضافہ ہے، جس سے لاگت میں نمایاں فرق آیا ہے۔

ریگولیٹری ادارے نے گیس مینجمنٹ سے متعلق سوئی ناردرن کے معاملات کو وفاقی حکومت کے سامنے رکھنے کی ہدایت بھی کی ہے، تاکہ پالیسی سطح پر اس کا جائزہ لیا جا سکے۔

اوگرا نے مزید سفارش کی ہے کہ وفاقی حکومت مختلف صارفین کی کیٹیگریز کے لحاظ سے گیس نرخوں کا تعین کرے، تاکہ مالی توازن اور صارفین کے مفادات کو بہتر طریقے سے مدنظر رکھا جا سکے۔

گیس نرخوں میں یہ تبدیلیاں دونوں کمپنیوں کے مالی سال 2025-26 کے متوقع شارٹ فال کے تجزیے کی بنیاد پر مرتب کی گئی ہیں۔

اوگرا کا کہنا ہے کہ حتمی نوٹیفکیشن وفاقی حکومت کی منظوری کے بعد جاری کیا جائے گا، جو نئی قیمتوں کے اطلاق کی تاریخ اور تفصیلات کا تعین کرے گا۔