شمالی وزیرستان کے علاقے میر علی میں پیش آنے والے افسوسناک واقعے میں سیکیورٹی فورسز کو ملوث کرنے کی گھناؤنی سازش بے نقاب ہوگئی۔

پاک فوج کے شعبہ تعلقات عامہ (آئی ایس پی آر) کے مطابق 19 مئی کو شمالی وزیرستان کے علاقے میر علی میں افسوسناک واقعہ پیش آیا جس میں بدقسمتی سے کئی شہری جانیں ضائع ہوئیں۔

آئی ایس پر آر کا کہنا ہے کہ بعض حلقوں کی جانب سے بے بنیاد اور گمراہ کن الزامات کا سلسلہ جاری ہے جس سے سیکیورٹی فورسز کو اس میں ملوث کرنے کی کوشش کی گئی ہے۔

ترجمان پاک فوج نے ان تمام دعوؤں کو سراسر جھوٹ پر مبنی قرار دیتے ہوئے ایک منظم منفی پراپیگنڈہ مہم کا حصہ قرار دیا جس کا مقصد انسداد دہشت گردی کی جاری کارروائیوں میں سیکیورٹی فورسز کی انتھک کاوشوں کو بدنام کرنا ہے۔

ترجمان کے مطابق ان الزامات کے ردعمل میں فوری طور پر ایک جامع تحقیقات کا آغاز کیا گیا، ابتدائی تحقیقات سے یہ بات سامنے آئی ہے کہ یہ بزدلانہ کارروائی بھارتی سرپرستی میں کام کرنے والی تنظیم “فتنہ الخوارج” نے منصوبہ بندی سے انجام دی۔

پاک فوج کے شعبہ تعلقات عامہ نے بتایا کہ واضح شواہد موجود ہیں کہ یہ عناصر اپنے بھارتی آقاؤں کے اشارے پر شہری علاقوں اور نہتے عوام کو ڈھال بنا کر اپنے قابلِ مذمت دہشتگردی کے مقاصد حاصل کرنا چاہتے ہیں۔

آئی ایس پر آر نے کہا کہ اس قسم کی چالوں کا مقصد سیکیورٹی فورسز اور مقامی آبادی کے درمیان غلط فہمیاں پیدا کرنا ہے جو ایک ساتھ مل کر دہشت گردی کے ناسور کو جڑ سے اکھاڑنے کے لیے پرعزم ہیں۔

ترجمان پاک فوج کا مزید کہنا ہے کہ سیکیورٹی فورسز اس عزم کا اعادہ کرتی ہیں کہ اس غیر انسانی اقدام کے مرتکب عناصر کو ہر صورت انصاف کے کٹہرے میں لایا جائے گا۔