چین کی جانب سے تیار کردہ جدید اور دنیا کا سب سے بڑا سمندری کار کیریئر “آن جی آنشینگ” اپنے پہلے تجارتی سفر پر یورپ کی جانب روانہ ہو گیا ہے، جس پر تقریباً 7,000 چینی ساختہ گاڑیاں لدی ہوئی ہیں۔

یہ عظیم الشان جہاز شنگھائی کے ہائیتونگ انٹرنیشنل آٹوموٹیو ٹرمینل سے روانہ ہوا، جو چین کے گاڑیوں کے سب سے مصروف برآمدی بندرگاہوں میں سے ایک ہے۔

 روانگی کے وقت بندرگاہ پر بڑی تعداد میں سرکاری و تجارتی نمائندگان موجود تھے، جنہوں نے اس پیش رفت کو چین کے جدید صنعتی شعبے کی کامیابی قرار دیا۔

228 میٹر طویل اور 37.8 میٹر چوڑے اس جہاز کی کل گنجائش 9,500 اسٹینڈرڈ گاڑیوں کی ہے، جو اسے گنجائش کے اعتبار سے دنیا کا سب سے بڑا کار کیریئر بناتی ہے۔ اس سے قبل یہ اعزاز چینی کمپنی BYD کے جہاز “شینزن” کو حاصل تھا، جس کا ریکارڈ آن جی آنشینگ نے صرف چند ہفتوں میں توڑ دیا۔

اس جہاز کی خاص بات اس میں شامل جدید توانائی بچت نظام اور کم کاربن اخراج والی اسمارٹ ٹیکنالوجی ہے۔ مزید برآں، اس میں میتھانول ری فیولنگ ڈیزائن بھی شامل ہے، جو آئندہ دہائیوں میں کاربن نیوٹرل شپنگ کی جانب ایک اہم قدم ہے۔

SAIC موٹر کارپوریشن کی ذیلی کمپنی آن جی لاجسٹکس کے جنرل منیجر ژوانگ جِنگ شیونگ کے مطابق، یہ جہاز چین کی برآمدی استعداد میں اضافے اور بین الاقوامی نقل و حمل میں خودانحصاری کی جانب اہم پیش رفت ہے۔

چین کی گاڑیوں کی برآمدات نے گزشتہ برسوں میں نمایاں ترقی کی ہے۔ 2024 میں چین نے 6.4 ملین سے زائد گاڑیاں برآمد کر کے مسلسل دوسرے سال دنیا میں سب سے زیادہ گاڑیاں برآمد کرنے والا ملک بننے کا اعزاز حاصل کیا۔