بھارت کو معرکہ حق میں شکست کے بعد جہاں مسلسل ہزیمت کا سامناکرنا پڑرہا ہے وہی غیر ملکی دانشور بھی پاکستان کی کامیابیوں کے معترف  دکھائی دیتے ہیں۔

بھارتی ٹی وی پروگرام کے دوران امریکی پروفیسر کرسٹین فیئر کا کہنا تھا کہ ’’ بھارت پاکستان کو ہر ممکن کوشش کے باوجود خوفزدہ نہیں کرسکا۔‘‘

پروفیسر کرسٹین فیئرنے کہا کہ ڈیٹرنس کا اندازہ اس ملک کے رویے سے لگایا جاتا ہے جسے روکنے کی کوشش کی جا رہی ہو، موجودہ حالات میں ایسا کوئی ثبوت نہیں کہ پاکستان نے اپنی پوزیشن ترک کی ہو یا موقف سے پیچھے ہٹا ہو۔

ان کا یہ بھی کہنا تھا کہ بھارت نے بے بنیاد دعوے کرکے خود کو ایک خطرناک صورتحال میں ڈال دیا ہے، بھارت کے اندر میڈیا، خاص طور پر جنہیں میں ‘فسادی  میڈیا’ کہتی ہوں، نے عوام کو غلط معلومات فراہم کی ہیں، حقیقت یہ ہے کہ بھارت پاکستان کو نہ کسی ناکامی سے دوچار کرسکا اور نہ ہی اسے خوفزدہ کرسکا ہے، پاکستان پیچھے نہیں ہٹا اور نہ ہی وہ بھاگا ہے۔

یہ بھی پڑھیں: معرکہ بنیان مرصوص؛ کانگرس رہنما نے بھارت کی عبرتناک شکست تسلیم کر لی

انہوں کہا کہ یہ تنازعہ بھارت کی توقع سے کہیں زیادہ تیزی سے شدت اختیار کر گیا، بھارت خود بھی چاہتا تھا کہ تنازعے کو کم کرنے کے لیے کوئی محفوظ راستہ نکالا جائے۔

پروفیسر کرسٹین فیئر نے مزید کہا کہ بدقسمتی سے بھارتی بے لگام میڈیا عوام میں ایسی توقعات پیدا کرتا ہے جو بعد میں عسکری تقاضوں کو جنم دیتی ہیں، بھارت اور اس کا میڈیا جنگجویانہ  رویہ رکھتے ہیں۔