نئی دہلی: بھارت کی انسداد دہشت گردی کی مرکزی ایجنسی (این آئی اے) نے ایک نیم فوجی اہلکار کو پاکستانی خفیہ اداروں کو حساس معلومات فراہم کرنے کے الزام میں گرفتار کرلیا ہے۔

نیشنل انویسٹی گیشن ایجنسی (این آئی اے) کے مطابق گرفتار شخص کی شناخت موتی رام جاٹ کے نام سے ہوئی ہے جو سینٹرل ریزرو پولیس فورس (سی آر پی ایف) کا ملازم ہے۔

حکام کا کہنا ہے کہ ملزم گزشتہ برس 2023 سے پاکستان کے خفیہ اداروں سے رابطے میں تھا اور ان کے ساتھ قومی سلامتی سے متعلق اہم اور خفیہ معلومات شیئر کرتا رہا۔

این آئی اے نے پیر کو جاری بیان میں کہا کہ ملزم کی سرگرمیاں ملک کی سلامتی کے لیے خطرناک ثابت ہوسکتی تھیں۔ عدالت نے اسے چھ جون تک جسمانی ریمانڈ پر این آئی اے کے حوالے کردیا ہے جہاں اس سے تفتیش جاری ہے۔

یاد رہے کہ بھارت میں پاکستان کے لیے جاسوسی کے الزام میں متعدد افراد کو گرفتار کیا جاچکا ہے۔ ان میں ایک ٹریول بلاگر خاتون بھی شامل ہے جس کے بارے میں پولیس کا کہنا ہے کہ وہ دو بار پاکستان جاچکی ہے اور مبینہ طور پر اسلام آباد میں پاکستانی سفارتخانے کے ایک اہلکار سے اس کے روابط تھے۔

دیگر زیر حراست افراد میں ایک طالب علم، ایک نجی سیکیورٹی گارڈ اور ایک کاروباری شخص بھی شامل ہیں جن پر قومی سلامتی کو نقصان پہنچانے کے لیے حساس معلومات فراہم کرنے کا شبہ ظاہر کیا گیا ہے۔