سوشل میڈیا پر ’تھل کی شہزادی‘ کے نام سے مشہور ٹک ٹاکر اقراء کو غیرت کے نام پر قتل کردیا گیا۔

پنجاب کے ضلع خوشاب کی تحصیل نور پور تھل میں غیرت کے نام پر قتل کا ایک افسوسناک واقعہ پیش آیا ہے۔ جہاں مقامی سطح پر شہرت رکھنے والی نوجوان ٹک ٹاکر کو قتل کردیا گیا۔

اقراء سوشل میڈیا پر ’تھل کی شہزادی‘ کے نام سے جانی جاتی تھیں جب کہ انہیں گھر میں ہی فائرنگ کرکے موت کے گھاٹ اتارا گیا ہے۔

پولیس حکام کے مطابق ابتدائی تحقیقات میں انکشاف ہوا ہے کہ اقراء کو ان کے قریبی رشتہ دار، جو ان کا کزن بتایا جا رہا ہے نے غیرت کے نام پر قتل کیا ہے۔

ڈی پی او خوشاب توقیر محمد نعیم کا کہنا ہے کہ ملزم کو سوشل میڈیا پر اقراء کی سرگرمیوں پر اعتراض تھا اور وہ انہیں ویڈیوز بنانے سے باز رکھنے کی کوشش کرتا رہا تھا۔

واقعے کے روز بھی تلخ کلامی کے بعد ملزم نے غصے میں آکر فائرنگ کی جس کے نتیجے میں اقراء موقع پر ہی دم توڑ گئیں۔

پولیس کے مطابق اطلاع ملتے ہی فوری طور پر کارروائی کرتے ہوئے ملزم کو گرفتار کرلیا اور تھانہ نور پور تھل میں مقدمہ درج کرکے مزید تفتیش کا آغاز کردیا گیا ہے۔

پولیس کا کہنا ہے کہ ملزم سے تفتیش جاری ہے تاکہ قتل کے محرکات اور واقعے کے پسِ منظر سے متعلق تمام تفصیلات سامنے لائی جاسکیں۔

واضح رہے کہ اقراء عرف ’تھل کی شہزادی‘ مقامی نوجوانوں میں خاصی مقبول تھیں اور ان کی ٹک ٹاک ویڈیوز کو ہزاروں صارفین فالو کرتے تھے۔ ان کی ناگہانی موت پر سوشل میڈیا صارفین کی جانب سے شدید دکھ اور غم کا اظہار کیا جا رہا ہے۔