بنگلہ دیش نے اتوار کے روز نئی کرنسی نوٹوں کی سیریز جاری کی ہے جس میں ملک کے بانی شیخ مجیب الرحمٰن کی تصویر شامل نہیں کی گئی۔

مرکزی بینک کے ترجمان عارف حسین خان کے مطابق، اس تبدیلی کے بعد نوٹوں پر اب کسی انسانی شخصیت کی تصویر شامل نہیں کی جائے گی، بلکہ قدرتی مناظر، تاریخی مقامات، ثقافتی ورثے اور مشہور فنون کو نمایاں کیا جائے گا۔

نئی کرنسی نوٹوں میں بنگالی مصور زین العابدین کے بنگال کے قحط پر بنائے گئے مشہور فن پارے کو شامل کیا گیا ہے، جب کہ پاکستان سے آزادی کی جنگ کے شہداء کی یادگار “نیشنل مارٹرز میموریل” بھی ایک نوٹ پر دکھائی دے گی۔

مزید پڑھیں: بنگلا دیش، خالدہ ضیاء کا ویڈیو لنک خطاب، انتقام کے امکان کو مسترد کر دیا

یہ تبدیلی بنگلہ دیش میں سیاسی حالات کے پس منظر میں آئی ہے۔ سابق وزیر اعظم شیخ حسینہ کی حکومت کے خاتمے کے بعد، نگران حکومت نے کرنسی کے ڈیزائن میں یہ اہم تبدیلی کی ہے، جس کی قیادت معروف ماہر معیشت محمد یونس کر رہے ہیں۔

یہ پہلا موقع نہیں ہے کہ بنگلہ دیش میں کرنسی نوٹوں کے ڈیزائن میں سیاسی اثرات دیکھنے کو ملے ہیں۔ 1972 میں آزادی کے بعد جاری کردہ نوٹوں پر ملک کا نقشہ تھا، جب کہ عوامی لیگ کی حکومت نے بعد میں شیخ مجیب الرحمٰن کی تصویر نوٹوں پر شامل کی تھی۔

نئے نوٹوں کی سیریز میں مجموعی طور پر نو مختلف مالیت کے نوٹ شامل ہیں، جن میں سے تین نوٹ اتوار کو جاری کیے گئے ہیں۔ باقی نوٹوں کو مرحلہ وار جاری کیا جائے گا، جبکہ موجودہ کرنسی نوٹ اور سکے بدستور گردش میں رہیں گے۔

اس اہم تبدیلی کے دوران بنگلہ دیش کے سیاسی منظرنامے کی پیچیدگیاں اور شیخ حسینہ کی جلاوطنی کی صورتحال بھی واضح ہو رہی ہیں، جن کے خلاف بغاوت کو کچلنے کے الزامات میں مقدمہ چل رہا ہے۔