بیرون ملک پھنسے پاکستانیوں کیلئے حکومت نے اہم اقدام اٹھالیا، پاکستان انٹرنیشنل ایئرلائنز نے بیرون ملک پھنسے پاکستانیوں کو وطن واپس لانے کے لئے خصوصی پروازوں کا شیڈول جاری کر دیا۔

ترجمان پاکستان انٹرنیشنل ایئرلائنز کے مطابق آج خصوصی پرواز سے بنکاک میں محصور پاکستانی شام 8 بجے پاکستان پہنچ جائیں گے جبکہ 15 اور 19 اپریل کو اسلام آباد اور کراچی سے ٹورنٹو کے لئے خصوصی پروازیں اڑان بھریں گی۔

ترجمان کا کہنا تھا کہ 17 اور 18 اپریل کو مانچسٹر کے لئے اسلام آباد سے پروازیں چلائی جائیں گی، 17 اپریل کو پی آئی اے کی 2 پروازیں اسلام آباد سے سیئول جنوبی کوریا کے لئے روانہ ہوں گی جب کہ پی آئی اے کا ایک خصوصی طیارہ دبئی میں پھنسے پاکستانیوں کو وطن واپس لائے گا۔

ترجمان پاکستان انٹرنیشنل ایئرلائنز نے اپنے میں کہا کہ شیڈول کے تحت 18 اپریل کو پی آئی اے کی خصوصی پرواز کراچی سے جکارتہ انڈونیشیا کےلئے روانہ ہوگی جبکہ 19 اپریل کو پی آئی اے ٹورنٹو سے کراچی کیلئے پرواز چلائے گی۔

ترجمان پی آئی اے  نے یہ بھی کہا کہ جن لوگوں کا ابھی تک پی آئی اے کا سفارت خانے کے عملے سے پروازوں پر بکنگ کے لئے رابطہ نہیں ہوا وہ فوری طور پر پی آئی اے سے رجوع کریں۔

ترجمان پاکستان انٹرنیشنل ایئرلائنز نے مزید کہا کہ بکنگ پی آئی اے کے دفاتر، ویب سائیٹ یا کال سینٹر سے کروائی جاسکتی ہے۔ ٹکٹ پاکستان سے بھی خریدے جاسکتے ہیں جو کہ وطن واپس آنے والے استعمال کر سکیں گے۔