نیویارک: چیئرمین پیپلز پارٹی و وزیر خارجہ بلاول بھٹو زرداری کی قیادت میں پاکستانی وفد نے اقوام متحدہ کے سیکریٹری جنرل انتونیو گوتریس سے ملاقات کی اور بھارت کے خلاف پاکستان کا مقدمہ پیش کر دیا۔

اس موقع پر بلاول بھٹو نے وزیراعظم پاکستان کا تحریری پیغام سیکریٹری جنرل کو پیش کیا اور پَہلگام حملے کے بعد کی صورتحال پر پاکستان کا مؤقف تفصیل سے بیان کیا۔

انہوں نے بھارت کی جانب سے پاکستان پر لگائے گئے الزامات کو بے بنیاد اور قبل از وقت قرار دیتے ہوئے انہیں سختی سے مسترد کیا۔

بلاول بھٹو نے خبردار کیا کہ بھارت کے یکطرفہ فوجی اقدامات جنوبی ایشیا کے امن و استحکام کو شدید خطرات سے دوچار کر سکتے ہیں۔

ان کا کہنا تھا کہ پاکستان اقوام متحدہ کے چارٹر، بین الاقوامی قوانین اور اپنے دفاع کے حق کے احترام کے لیے پرعزم ہے۔

وزیر خارجہ نے واضح کیا کہ بھارت کا جارحانہ رویہ ایٹمی خطے میں کسی بڑے تنازع کا پیش خیمہ بن سکتا ہے۔

 اس کے علاوہ بلاول بھٹو نے سندھ طاس معاہدے کی بحالی کے لیے اقوام متحدہ سے مؤثر کردار ادا کرنے کی اپیل کی اور کہا کہ پاکستان پر آبی جارحیت مسلط کی جا رہی ہے۔

سیکریٹری جنرل اقوام متحدہ انتونیو گوتریس نے پاکستان کی امن کی خواہش کو سراہتے ہوئے کہا کہ اقوام متحدہ جنوبی ایشیا میں قیام امن اور کشیدگی میں کمی کے لیے سرگرم عمل ہے اور تنازعات کے حل کے لیے اپنی حمایت جاری رکھے گا۔