چیئرمین آل کراچی تاجر اتحاد نے لاک ڈائون کے تحت کاروبار بند کرنے کا اعلان کردیا۔

تفصیلات کے مطابق آل کراچی تاجر اتحاد کے چیئرمین عتیق میر نے اپنے بیان میں کہا کہ کل شہر کی تمام مارکیٹیں لاک ڈائون کے تحت بند رہینگی کیونکہ تاجر برادری ریاست کے خلاف بغاوت کی حمایت نہیں کرتی۔

آل کراچی تاجر اتحاد کے چیئرمین عتیق میر نے کہا کہ کرونا جیسی مہلک وباء سے بچائو پہلی اور کاروبار دوسری ترجیع ہے۔

چیئرمین آل کراچی تاجر اتحاد نے یہ بھی کہا کہ چھوٹے کاروباری طبقے کو مزید تباہی سے بچانے کیلئے ہنگامی بنیادوں پر اقدامات کیئے جائیں جبکہ حکومت سندھ عید کی خرید و فروخت کے تحت مخصوص کاروبار کھولنے کی اجازت دے۔

اپنے بیان میں آل کراچی تاجر اتحاد کے چیئرمین عتیق میر نے مزید کہا کہ کرونا آفت ہے ٹیکس پالیسی نہیں جس کے خلاف احتجاج کیا جائے جبکہ حکومت محفوظ، محدود اور محتاط کاروبار کرنے کی پالیسی بنائے تاجر زبردستی دکانیں کھلوانے کی حمایت نہیں کرتے۔

تاجروں کا کل سے کاروبار کھولنے کا اعلان

اس موقع پر رضوان عرفان الیکٹرونکس ڈیلرز ایسوسی ایشن نے کہا کہ کمشنر کراچی اور ایڈیشنل آئی جی کی درخواست پر مارکیٹین کھولنے کا فیصلہ دو دن تک موخر کر دیا ہے۔

یاد رہے اس سے قبل بھی سندھ کی تاجر تنظیموں کے رہنماؤں نے 15 اپریل سے صوبے بھر میں کاروبار کھولنے کا اعلان کردیا تھا۔

کراچی میں پریس کانفرنس کرتے ہوئے چیئرمین سندھ تاجر اتحاد جمیل پراچہ نے کہا تھا کہ 28 دن سے کراچی بند ہے اور لوگ سسک رہے ہیں، کراچی سے کشمور تک کا تاجر بدحال ہوچکا ہے، چھوٹے تاجر اوران کے ملازم فاقہ کشی پر مجبور ہوچکے ہیں۔

انہوں نے کہا تھا کہ لاکھوں ملازمین کو ایک ماہ کی بمشکل تنخواہیں ادا کی ہیں، کل سے تمام حفاظتی انتظامات کےساتھ دکانیں کھول دیں گے۔

تاجررہنماؤں کا کہنا تھا کہ حکومت عوام کو گھروں میں بٹھانے میں مکمل طورپرناکام رہی، اگر حکومت سنجیدہ ہے تو لاک ڈاؤن نہیں کرفیو لگائے، حکومت سوچ سمجھ کرفیصلہ کرے۔