اسرائیل اور ایران کے درمیان کشیدگی میں اضافہ، ایران کے جوہری پروگرام کی پیشرفت، اور امریکا کی مداخلت نے اس خطے میں جنگ کے خطرات کو بڑھا دیا ہے۔

عالمی خبررساں اداروں کے مطابق، اسرائیل ایران کی جوہری تنصیبات پر حملے کے لیے “مکمل طور پر تیار” ہے۔ یہ کارروائی خطے میں امریکی مفادات کو نشانہ بنانے اور وسیع تر جنگ کے آغاز کا سبب بن سکتی ہے۔ امریکا اس ممکنہ حملے کے نتائج کے لیے تیاری کر رہا ہے۔

ادھر ایران نے یورینیم کی افزودگی کو 60% تک بڑھا دیا ہے، جو جوہری ہتھیار بنانے کے لیے کافی ہے۔ امریکی انٹیلی جنس کے مطابق، ایران کے پاس جوہری ہتھیار بنانے کے لیے درکار مواد موجود ہے۔

ایران کے وزیر دفاع نے خبردار کیا ہے کہ اگر جوہری مذاکرات ناکام ہوئے اور نوبت جنگ تک پہنچی تو ایران خطے میں امریکی اڈوں کو نشانہ بنائے گا۔

مزید پڑھیں: ایران اسرائیل پر میزائل حملے کی تیاری کر رہا ہے، امریکہ

ایران نے حال ہی میں دو ٹن وزنی وار ہیڈ والے میزائل کا بھی تجربہ کیا ہے، جس کے بعد کشیدگی میں مزید اضافہ ہوگیا ہے۔

اسرائیل ایران جنگ کے پیش نظر امریکا نے بغداد اور اربیل میں اپنے سفارتی عملے کو غیر ضروری سیکیورٹی خطرات کے پیش نظر نکال لیا ہے۔ یہ اقدام ایران کی دھمکیوں اور خطے میں بڑھتی ہوئی کشیدگی کے تناظر میں اٹھایا گیا ہے۔

اتوار، 15 جون 2025 کو عمان کے شہر مسقط میں ایران اور امریکا کے درمیان جوہری مذاکرات کا چھٹا دور متوقع ہے۔ اگر مذاکرات کامیاب ہوتے ہیں تو ایران کی یورینیم افزودگی میں کمی اور امریکہ کی اقتصادی پابندیوں میں نرمی ہو سکتی ہے۔

تاہم، اگر بات چیت ناکام ہوئی تو اس سے خطے میں مزید کشیدگی اور ممکنہ فوجی کارروائیوں کا خطرہ بڑھ جائے گا۔