چیف آف آرمی اسٹاف فیلڈ مارشل سید عاصم منیر نے امریکہ کے سرکاری دورے کے دوران واشنگٹن میں مقیم پاکستانی کمیونٹی سے ملاقات کی۔

پاک فوج کے شعبہ تعلقات عامہ (آئی ایس پی آر) کے مطابق اوورسیز پاکستانیوں کی بڑی تعداد نے چیف آف آرمی اسٹاف کا پرتپاک استقبال کیا۔

اوورسیز پاکستانیوں نے  معرکہ حق میں کامیابی، مسلح افواج کی بہادری اور پیشہ وارانہ مہارت کو سراہتے ہوئے آپریشن بُنْيَانٌ مَّرْصُوْص کے دوران مسلح افواج کی شاندار کارکردگی، ان کی بہادری اور پیشہ ورانہ صلاحیتوں کو بھرپور خراج تحسین پیش کیا۔

فیلڈ مارشل عاصم منیر نے اوورسیز پاکستانیوں کو پاکستان کے حقیقی سفیر قرار دیتے ہوئے معیشت میں ان کی خدمات اور سرمایہ کاری کو خراج تحسین پیش کیا۔

یہ بھی پڑھیں: فیلڈ مارشل سیدعاصم منیرکی مقبولیت میں اضافہ ہوگیا،عالمی ادارے کی رپورٹ

آرمی چیف نے پاکستان کی معاشی ترقی اور عالمی ساکھ بہتر بنانے کے حوالے سے اوورسیز پاکستانیوں کے کردار کو سراہتے ہوئے کہا کہ اوورسیز پاکستانیوں نے ترسیلات زر، سرمایہ کاری اور مختلف شعبوں میں اپنی اعلی کامیابیوں کی بدولت اہم کردار ادا کیا ہے۔

اوورسیز پاکستانیوں نے آرمی چیف کے ساتھ اپنے تجربات اور تجاویز بھی شیئر کیں، جنرل عاصم منیر نے ان کے ساتھ روابط مزید مضبوط بنانے، چیلنجز کے حل اور قومی ترقی کے لیے مل کر کام کرنے کی ضرورت پر زور دیا۔

یہ ملاقات ایک نئے عزم اور وابستگی کے ساتھ اختتام پذیر ہوئی، جس میں آرمی چیف اور اوورسیز پاکستانیوں نے ایک محفوظ، خوشحال اور مضبوط پاکستان کے لیے مل کر کام کرنے کے عزم کا اعادہ کیا۔