واشنگٹن: چیف آف آرمی اسٹاف فیلڈ مارشل سید عاصم منیر نے وائٹ ہاؤس میں امریکی صدر ڈونلڈ ٹرمپ سے ملاقات کی، جس میں پاک امریکہ تعلقات کو مزید مضبوط بنانے اور باہمی دلچسپی کے اہم امور پر تبادلہ خیال ہوا۔

آئی ایس پی آر کی جانب سے جاری کردہ مشترکہ اعلامیے کے مطابق ملاقات کا آغاز وائٹ ہاؤس کے کیبنٹ روم میں ایک رسمی ظہرانے سے ہوا، جس کے بعد دونوں رہنماؤں نے اوول آفس میں تفصیلی بات چیت کی۔

صدر ٹرمپ کے ہمراہ امریکی وزیر خارجہ مارکو روبیو اور نمائندہ خصوصی اسٹیو وٹکوف موجود تھے جبکہ آرمی چیف کے ہمراہ پاکستان کے قومی سلامتی کے مشیر بھی شریک تھے۔

حالیہ پاک-بھارت کشیدگی اور امریکا کا کردار

آرمی چیف نے حالیہ پاک-بھارت کشیدگی کے دوران تعمیری کردار ادا کرنے پر صدر ٹرمپ اور امریکی حکومت کا شکریہ ادا کیا۔

انہوں نے کہا کہ حکومتِ پاکستان اور عوام کی جانب سے جنگ بندی کے لیے امریکی تعاون کو قدر کی نگاہ سے دیکھا جاتا ہے۔

عالمی چیلنجز اور دوطرفہ تعاون

دوران ملاقات فیلڈ مارشل عاصم منیر نے صدر ٹرمپ کی قائدانہ اور مدبرانہ صلاحیتوں کو سراہتے ہوئے کہا کہ عالمی برادری کو درپیش کثیر الجہتی چیلنجز سے نمٹنے میں امریکی صدر کی بصیرت اہم کردار ادا کر سکتی ہے۔

صدر ٹرمپ نے بھی علاقائی امن و استحکام کے لیے پاکستان کی کوششوں کو سراہا اور انسداد دہشت گردی کے شعبے میں دونوں ممالک کے درمیان جاری مضبوط تعاون کی تعریف کی۔

اعلامیے کے مطابق دونوں فریقین نے انسداد دہشت گردی کے شعبے میں شراکت داری کو مزید مضبوط بنانے پر بھی اتفاق کیا۔

اقتصادی اور ٹیکنالوجی کے شعبوں میں تعاون

ملاقات کے دوران تجارت، اقتصادی ترقی، معدنیات، توانائی، مصنوعی ذہانت، کرپٹو کرنسی اور ابھرتی ہوئی ٹیکنالوجیز جیسے شعبوں میں تعاون پر بھی بات ہوئی۔

صدر ٹرمپ نے پاکستان کے ساتھ طویل المدتی اسٹریٹجک اشتراک اور تجارتی شراکت داری میں گہری دلچسپی کا اظہار کیا۔

ایران-اسرائیل کشیدگی پر گفتگو

ملاقات میں ایران اور اسرائیل کے درمیان موجودہ کشیدگی پر بھی تفصیلی تبادلہ خیال کیا گیا اور دونوں رہنماؤں نے خطے میں پائیدار امن کے لیے سفارتی حل کی اہمیت پر زور دیا۔

ملاقات کی مدت اور ماحول

ابتدائی طور پر ایک گھنٹے کے لیے طے شدہ یہ ملاقات دو گھنٹے تک جاری رہی، جو بات چیت کے خوشگوار ماحول اور گہرائی کی عکاسی کرتی ہے۔

آئی ایس پی آر کے مطابق یہ ملاقات دونوں ممالک کے دیرینہ تعلقات کو نئی جہت دینے اور مشترکہ اہداف، جیسے امن، استحکام اور خوشحالی، کے حصول کے لیے جاری کوششوں کا اہم حصہ ہے۔