ایرانی وزیرخارجہ عباس عراقچی نے کہاکہ ثابت ہوگیا امریکہ اور اسرائیل طاقت کی زبان سمجھتے ہیں۔

ایرانی وزیرخارجہ عباس عراقچی نے پریس کانفرنس کرتے ہوئے کہا کہ امریکہ نے جوہری تنصیبات پرحملہ کرکے جارحیت کی، امریکی جارحیت کے تباہ کن نتائج برآمد ہوں گے۔

عباس عراقچی نے کہا کہ حملہ یواین چارٹر کی سنگین خلاف ورزی ہے، اپنی آزادی، خودمختاری پرکوئی سمجھوتہ نہیں کریں گے، ٹرمپ نےحملہ کرکےاپنےعوام سےبھی وعدہ خلافی کی ہے، اقوام متحدہ، آئی  اے ای اے نوٹس لیکر ضروری اقدامات اٹھائیں۔

یہ بھی پڑھیں: اسرائیلی حملے سے قبل ایران ایٹمی معاہدے کے قریب تھا،ایرانی وزیرخارجہ

ایرانی وزیر خارجہ نے سلامتی کونسل کا ہنگامی اجلاس بلانے کا مطالبہ کرتے ہوئے کہا کہ امریکہ کومجرمانہ اقدامات پرجوابدہ ٹھہرایا جائے۔

عباس عراقچی کا کہنا تھا کہ صدرٹرمپ نے ایران کو دھوکہ دیا ہے، نتائج کی ذمہ داری اب امریکہ پرہوگی، سفارتکاری کیلئے ہمیشہ دروازےکھلےرکھنےچاہییں لیکن اب ایساکچھ نہیں۔

ایرانی وزیر خارجہ نے کہا کہ ہم ابھی حملوں کی زد میں ہیں، ایران کو مذاکرات کی ٹیبل پر واپس بلانےکاکوئی فائدہ نہیں، جب ہم مذاکرات کررہے تھے تو ہم پر حملہ کیاگیا۔

عباس عراقچی کا کہنا تھا کہ ٹرمپ نے انتخابی مہم میں کہا تھا کہ جنگوں کو ختم کریں گے، بین الاقوامی برادری امریکی حملوں پرفوری ایکشن لے۔

ایرانی وزیر خارجہ نے مزید کہا کہ روس ایران کا اچھا دوست ہے، روسی صدر سے ملاقات کیلئے آج ماسکوجارہا ہوں۔