ملک میں مون سون بارشوں کا سلسلہ شروع ہوگیا ہے، جڑواں شہروں اسلام آباد اور راولپنڈی میں صبح سویرے سے جاری موسلا دھار بارش نے موسم خوشگوار بنا دیا ہے۔

 بارش کے باعث نشیبی علاقوں اور سڑکوں پر پانی جمع ہو گیا، جبکہ نالہ لئی میں بھی پانی کی سطح بلند ہو رہی ہے۔

محکمہ موسمیات کے مطابق بارش کا یہ سلسلہ وقفے وقفے سے آئندہ چند روز تک جاری رہنے کا امکان ہے۔

پنجاب کے مختلف علاقوں میں بھی مون سون کے بادل برسنے لگے ہیں، گجرات اور گوجر خان میں تیز بارش ہوئی جبکہ لاہور میں بادلوں نے ڈیرے ڈال رکھے ہیں۔

اس کے علاوہ فیصل آباد، گوجرانوالہ اور دیگر شہروں میں بھی بارش کا امکان ظاہر کیا گیا ہے۔

محکمہ موسمیات کا کہنا ہے کہ رواں سال مون سون کے دوران معمول سے 25 فیصد زیادہ بارشیں متوقع ہیں، جس کے نتیجے میں خاص طور پر پنجاب میں شدید بارشوں کا خدشہ ہے جبکہ شہری علاقوں میں اربن فلڈنگ کا بھی خطرہ موجود ہے، جس کے لیے متعلقہ اداروں کو الرٹ کر دیا گیا ہے۔

دوسری جانب آزاد جموں و کشمیر کے مختلف علاقوں میں بھی گرج چمک کے ساتھ بارش کا سلسلہ جاری ہے، مظفرآباد اور گردونواح میں موسم خوشگوار ہو گیا ہے جبکہ وادی لیپہ کے بالائی علاقوں میں ٹھنڈک بڑھ گئی ہے۔

محکمہ موسمیات نے خیبرپختونخوا اور بلوچستان میں بھی آئندہ دنوں میں موسلا دھار بارش کی پیشگوئی کی ہے، جس سے پہاڑی اور میدانی علاقوں میں لینڈ سلائیڈنگ اور مقامی ندی نالوں میں طغیانی کا خدشہ ظاہر کیا گیا ہے۔