اسلام آباد: چین کے شہر چنگ ڈاؤ میں ہونے والے شنگھائی تعاون تنظیم (ایس سی او) کے وزرائے دفاع اجلاس میں پاکستان نے بھرپور شرکت کرکے دشمنوں کو آئینہ دکھادیا۔

ایس سی او اجلاس میں پاکستانی وفد کی قیادت وفاقی وزیر دفاع خواجہ محمد آصف نے کی، جنہوں نے اجلاس سے خطاب کرتے ہوئے کہا کہ پاکستان ایس سی او کے اصولوں اور مقاصد سے پُرعزم وابستگی رکھتا ہے۔

خواجہ آصف نے اجلاس کے دوران اجتماعی سلامتی، انسداد دہشت گردی کے لیے مربوط تعاون اور علاقائی روابط کے فروغ پر زور دیا۔ شنگھائی تعاون تنظیم علاقائی استحکام، باہمی اعتماد اور شراکت داری کو فروغ دینے کا ایک مضبوط اور مؤثر ستون ہے۔

وزیر دفاع نے اپنے خطاب میں واضح کیا کہ پاکستان اقوامِ متحدہ کے منشور، ایس سی او چارٹر اور بین الاقوامی قوانین کی مکمل پاسداری کرتا ہے۔ انہوں نے خطے میں امن کے قیام کے لیے ہر ممکن تعاون کی یقین دہانی کرائی۔

ایران پر اسرائیلی حملے کی شدید مذمت

وزیر دفاع خواجہ آصف نے اسرائیل کے ایران پر غیر قانونی اور بلااشتعال حملوں کی شدید مذمت کی اور کہا کہ ایسے اقدامات سے خطے میں عدم استحکام بڑھ رہا ہے۔

انہوں نے غزہ میں جاری انسانی بحران اور اسرائیلی بربریت پر گہری تشویش کا اظہار کرتے ہوئے فلسطینی عوام پر حملے بند کرنے اور فوری و مستقل جنگ بندی پر زور دیا۔

افغانستان، دہشت گردی اور علاقائی خطرات پر مؤقف

خواجہ آصف نے کہا کہ افغانستان میں پائیدار امن اور استحکام نہ صرف افغانستان بلکہ پورے خطے اور ایس سی او ویژن کے لیے ناگزیر ہے۔

انہوں نے کہا کہ دہشت گردی پوری دنیا کے لیے مشترکہ خطرہ ہے اور اسے کسی صورت سیاسی مقاصد کے لیے استعمال نہیں کرنا چاہیے۔

انہوں نے جعفر ایکسپریس جیسے دہشت گرد حملوں کی شدید مذمت کرتے ہوئے کہا کہ ان حملوں کے منصوبہ سازوں، مالی معاونین اور سرپرستوں کو ہر صورت انصاف کے کٹہرے میں لایا جانا چاہیے۔

کشمیر اور فلسطین: عالمی امن کے لیے حل طلب تنازعات

وزیر دفاع نے عالمی برادری پر زور دیا کہ کشمیر اور فلسطین جیسے دیرینہ تنازعات عالمی امن کے لیے خطرہ ہیں اور ان کے پرامن حل کے لیے مذاکرات، ثالثی اور سفارتی حکمتِ عملی کو اپنایا جائے۔

اہم دو طرفہ ملاقاتیں

اس موقع پر وزیر دفاع خواجہ محمد آصف نے تاجکستان، ایران، قازقستان اور چین کے وزرائے دفاع سے دو طرفہ ملاقاتیں بھی کیں جن میں دفاعی تعاون، سیکیورٹی امور اور علاقائی استحکام سے متعلق امور پر گفتگو ہوئی۔

انہوں نے مزید کہا کہ پاکستان کا ایس سی او میں فعال کردار علاقائی ہم آہنگی اور مشترکہ سیکیورٹی تعاون کے فروغ میں ایک اہم ستون کی حیثیت رکھتا ہے۔