لاہور: متنازع بیانات کے باعث خبروں میں رہنے والے معروف پاکستانی یوٹیوبر رجب بٹ کے گھر پر نامعلوم افراد نے فائرنگ کر دی اور فرار ہو گئے۔

 واقعے میں کوئی جانی نقصان تو نہیں ہوا، تاہم گھر کے باہر موجود ایک پالتو کتا گولی لگنے سے ہلاک ہو گیا۔

چوہنگ پولیس نے رجب بٹ کی مدعیت میں نامعلوم افراد کے خلاف مقدمہ درج کر کے تحقیقات کا آغاز کر دیا ہے۔

مقدمہ تعزیراتِ پاکستان کی دفعات 440 (گھریلو نقصان پہنچانے کی نیت سے زبردستی داخل ہونا) اور 429 (جانور کو نقصان پہنچانا) کے تحت درج کیا گیا ہے۔

ایف آئی آر کے مطابق واقعہ نجی ہاؤسنگ سوسائٹی میں پیش آیا جہاں چار نامعلوم افراد کراچی نمبر پلیٹس والی سفید گاڑی میں سوار ہو کر آئے اور رجب بٹ کے گھر پر فائرنگ کی، گولیاں گھر کی دیواروں سے ٹکرائیں لیکن کوئی فرد زخمی نہیں ہوا، فائرنگ کے نتیجے میں گھر کے باہر بیٹھا پالتو کتا جان کی بازی ہار گیا۔

رجب بٹ کا کہنا ہے کہ یہ واقعہ دو روز قبل پیش آیا اور جیسے ہی فائرنگ ہوئی، انہوں نے فوری طور پر پولیس ہیلپ لائن 15 پر اطلاع دی، تاہم حملہ آور فرار ہو چکے تھے۔

پولیس حکام کا کہنا ہے کہ رجب بٹ خود بھی بعض سنگین نوعیت کے مقدمات میں مطلوب ہیں، تاہم اس واقعے کی تفتیش الگ طور پر جاری ہے اور تمام پہلوؤں کا جائزہ لیا جا رہا ہے۔