شہر قائد میں پانی کی فراہمی ایک بار پھر شدید متاثر ہو گئی ہے کیونکہ کے الیکٹرک کی ناقص کارکردگی کے باعث واٹر کارپوریشن کی اہم تنصیبات پر بار بار بجلی کا بریک ڈاؤن ہو رہا ہے۔

سب سے زیادہ متاثر ہونے والے ڈملوٹی، کے تھری اور دھابیجی پمپنگ اسٹیشنز ہیں، جہاں بجلی کی بندش سے لاکھوں شہری پانی کی بوند بوند کو ترس رہے ہیں۔

ڈملوٹی پمپنگ اسٹیشن پر 24 گھنٹے بعد بجلی کی جزوی بحالی کے فوراً بعد ایک مرتبہ پھر بریک ڈاؤن ہوا، جس سے ملیر کینٹ، کوکراپار اور میمن گوٹھ کے علاقوں میں پانی کی سپلائی مکمل طور پر بند ہوگئی۔

ترجمان واٹر کارپوریشن کے مطابق صورتحال شدید تشویشناک ہے کیونکہ نارتھ ایسٹ کراچی اولڈ پمپ ہاؤس پر تو بجلی بحال ہو چکی ہے، تاہم باقی تنصیبات اب بھی متاثر ہیں۔

ذرائع کے مطابق، دھابیجی پمپنگ اسٹیشن پر بریک ڈاؤن کا آغاز 26 جون کی رات 10 بجے ہوا، جسے اب 67 گھنٹے سے زائد کا وقت گزر چکا ہے، مگر فالٹ تاحال دور نہیں کیا جا سکا۔

اس طویل تاخیر کی ذمہ داری براہ راست کے الیکٹرک پر عائد ہوتی ہے، جس کی عدم توجہی سے شہر کو اب تک 235 ملین گیلن پانی کی کمی کا سامنا کرنا پڑا ہے۔

ترجمان واٹر کارپوریشن کے مطابق، کے تھری پمپنگ اسٹیشن کے دو اہم پمپ بھی بجلی نہ ہونے کے باعث بند ہیں، جس کی وجہ سے ناظم آباد، نیو کراچی، لانڈھی، کورنگی سمیت شہر کے کئی علاقے پانی کی شدید قلت سے دوچار ہیں۔