وفاقی وزیر داخلہ محسن نقوی نے سکھر میں میڈیا سے گفتگو کرتے ہوئے کہا کہ محرم الحرام کے موقع پر ملک بھر میں سیکیورٹی کے خصوصی انتظامات کیے گئے ہیں، اور آج ملک بھر میں 27 ہزار سے زائد جلوس نکالے جا رہے ہیں، جو مجموعی طور پر پرامن طریقے سے جاری ہیں۔

وزیر داخلہ نے کہا کہ سیکیورٹی کے تمام ادارے اپنے فرائض بہترین طریقے سے انجام دے رہے ہیں، جس پر وہ انہیں خراجِ تحسین پیش کرتے ہیں۔

محسن نقوی کے مطابق سکھر میں پاکستان کا سب سے بڑا اور قدیمی محرم جلوس نکالا جاتا ہے، جس میں اس سال 10 لاکھ سے زائد افراد کی شرکت متوقع ہے۔

انہوں نے وضاحت کی کہ سکھر شہر میں عوامی سہولت کے پیش نظر زیادہ سڑکیں بند نہیں کی گئیں اور ٹریفک پلان کو موثر طریقے سے نافذ کیا جا رہا ہے۔

ایک صحافی کی جانب سے سوال کیا گیا کہ کیا آصف علی زرداری کو ہٹایا جا رہا ہے اور نئی کابینہ بنائی جا رہی ہے؟ تو اس پر وزیر داخلہ نے مختصر جواب دیتے ہوئے کہا کہ سوشل میڈیا پر چلنے والی خبروں پر دھیان نہ دیں۔

انہوں نے مزید کہا کہ موجودہ حالات کے پیش نظر محرم الحرام کے ابتدائی دو دن سیاست سے گریز کیا جائے تاکہ ملکی فضا کو پرامن رکھا جا سکے۔

وزیر داخلہ نے عوام سے بھی اپیل کی کہ وہ افواہوں پر کان نہ دھریں اور سیکیورٹی اداروں سے مکمل تعاون کریں تاکہ محرم کے جلوس و مجالس پرامن انداز میں منعقد ہو سکیں۔