شہر قائد کے قدیم علاقے لیاری آگرہ تاج میں واقع ایک 7 منزلہ رہائشی عمارت شدید خستہ حالی کا شکار ہے، جہاں دراڑیں پڑ چکی ہیں اور عمارت کسی بھی وقت زمین بوس ہونے کا خدشہ ہے، تاہم متعلقہ ادارے تاحال حرکت میں نہیں آئے۔

مقامی مکینوں کے مطابق، اس عمارت کو رواں سال اپریل 2025 میں سندھ بلڈنگ کنٹرول اتھارٹی (SBCA) کی جانب سے ناقابل رہائش قرار دیا جا چکا ہے، مگر اس کے باوجود نہ تو عمارت خالی کرائی گئی اور نہ ہی کوئی حفاظتی اقدامات کیے گئے ہیں۔

ذرائع کے مطابق، عمارت بغیر نقشے کی منظوری کے تعمیر کی گئی تھی اور اس میں 12 رہائشی یونٹس بنائے گئے ہیں۔ اس وقت بھی یہاں 10 سے زائد خاندان رہائش پذیر ہیں، جن کی زندگیوں کو شدید خطرات لاحق ہیں۔

مزید پڑھیں: لیاری میں پانچ منزلہ رہائشی عمارت منہدم، 7 افراد جاں بحق، متعدد زخمی

مکینوں کا کہنا ہے کہ بلڈر نے حال ہی میں رنگ و روغن کرا کر عمارت کو بہتر حالت میں ظاہر کرنے کی کوشش کی، تاکہ ضلعی انتظامیہ کی توجہ سے بچا جا سکے۔ مگر عمارت کی بنیادوں اور دیواروں میں واضح دراڑیں موجود ہیں جو ہر گزرتے دن کے ساتھ خطرے کو بڑھا رہی ہیں۔

یاد رہے کہ گزشتہ دنوں لیاری بغدادی میں ایک 5 منزلہ عمارت گرنے سے اب تک 19 قیمتی جانیں ضائع ہو چکی ہیں، جبکہ کچھ روز قبل کھارادر کے علاقے میں بھی 7 منزلہ عمارت کے صحن کی پانچ چھتیں گر چکی ہیں۔ ان حادثات کے باوجود متعلقہ اداروں کی غفلت برقرار ہے۔

علاقہ مکینوں نے ضلعی انتظامیہ، سندھ حکومت اور ایس بی سی اے سے مطالبہ کیا ہے کہ وہ فوری طور پر کارروائی کریں، عمارت کو خالی کروایا جائے، اور مکینوں کو متبادل رہائش فراہم کی جائے، تاکہ مزید جانوں کا ضیاع روکا جا سکے۔