اسلام آباد: وزیراعظم شہباز شریف سے وزیر داخلہ محسن نقوی نے ملاقات کی جس میں یوم عاشور کے موقع پر سیکیورٹی انتظامات سے متعلق تفصیلی بریفنگ دی گئی۔

وزیر داخلہ نے بتایا کہ ملک بھر میں عاشورہ کے جلوسوں اور مجالس کے دوران امن و امان کی صورتحال کو برقرار رکھنے کے لیے تمام ممکنہ اقدامات کیے گئے۔

وزیراعظم شہباز شریف نے سیکیورٹی کے مثالی انتظامات پر وزرائے اعلیٰ، وزیراعظم آزاد کشمیر، صوبائی حکومتوں، پولیس، سیکیورٹی فورسز اور رینجرز کو خراج تحسین پیش کیا۔ انہوں نے کہا کہ تمام اداروں کی پیشہ ورانہ اور مربوط حکمت عملی کے نتیجے میں یوم عاشور پر پرامن فضا کا قیام ممکن ہوا۔

وزیراعظم نے صوبائی انتظامیہ، قانون نافذ کرنے والے اداروں، اور دیگر متعلقہ فورسز کی کارکردگی کو سراہتے ہوئے کہا کہ ان کی شبانہ روز محنت اور مستعدی سے ملک میں امن برقرار رکھنے میں مدد ملی۔

وزیر داخلہ محسن نقوی نے کہا کہ عاشورہ کے موقع پر عوام کو سہولیات کی فراہمی اور سیکیورٹی کے لیے ہر سطح پر مربوط انتظامات کیے گئے، جن میں ٹریفک مینجمنٹ، ہنگامی طبی امداد، موبائل نیٹ ورک کی بحالی اور جلوسوں کے راستوں پر صفائی شامل ہے۔

وزیراعظم نے ملک بھر میں اتحاد، رواداری اور بین المسالک ہم آہنگی کے ماحول کو برقرار رکھنے پر عوام، علماء کرام اور انتظامیہ کا شکریہ ادا کیا اور اس تسلسل کو آئندہ بھی برقرار رکھنے کی ہدایت کی۔