اسلام آباد: فیلڈ مارشل سید عاصم منیر نے نیشنل ڈیفنس یونیورسٹی میں بھارت کو دوٹوک اور موثر جواب دیتے ہوئے کہا کہ جنگیں نعرے بازی اور جدید اسلحہ سے نہیں بلکہ قومی عزم سے جیتی جاتی ہیں۔

چیف آف آرمی اسٹاف اور فیلڈ مارشل سید عاصم منیر (نشان امتیاز ملٹری) نے نیشنل ڈیفنس یونیورسٹی اسلام آباد کا اہم دورہ کیا اور ’’نیشنل سیکیورٹی اینڈ وار کورس‘‘ مکمل کرنے والے مسلح افواج کے افسران سے خطاب کیا۔

اپنے خطاب میں آرمی چیف نے جدید جنگی چیلنجز، علاقائی کشیدگی اور قومی سلامتی کو لاحق خطرات پر کھل کر گفتگو کی اور موجودہ حالات میں مسلح افواج کی پیشہ ورانہ تیاری اور ذمہ داریوں پر زور دیا۔

مستقبل کی جنگیں: ہائبرڈ، غیر روایتی اور ہمہ جہتی خطرات

فیلڈ مارشل نے جنگ کے بدلتے ہوئے کردار پر روشنی ڈالتے ہوئے کہا کہ مستقبل کی جنگیں ہائبرڈ، روایتی اور غیر روایتی خطرات کا امتزاج ہوں گی جن سے نمٹنے کے لیے مسلح افواج کو نہ صرف عملی بلکہ ذہنی اور ادارہ جاتی سطح پر بھی تیار ہونا ہوگا۔

انہوں نے زور دیا کہ ذہنی پختگی، عملی بصیرت اور ادارہ جاتی مہارت جدید جنگی ماحول کا بنیادی تقاضا ہے۔

نیشنل ڈیفنس یونیورسٹی کے کردار کو سراہا

آرمی چیف نے نیشنل ڈیفنس یونیورسٹی کو مستقبل کی قیادت تیار کرنے والا ایک اہم قومی ادارہ قرار دیتے ہوئے کہا کہ یہ ادارہ افواج اور سول اداروں کے درمیان ہم آہنگی کو فروغ دینے میں کلیدی کردار ادا کرتا ہے۔

بھارتی ناکامی اور بے بنیاد الزامات پر دو ٹوک ردعمل

فیلڈ مارشل نے بھارت کے آپریشن سندور اور آپریشن بنیان مرصوص سے متعلق حالیہ بیانات پر ردعمل دیتے ہوئے کہا کہ بھارت آپریشن سندور کے دوران اپنے مقرر کردہ اہداف حاصل کرنے میں ناکام رہا اور اب وہ اپنی ناکامی کو چھپانے کے لیے غیر منطقی وضاحتیں پیش کر رہا ہے۔

انہوں نے بھارت کی جانب سے پاکستان پر بیرونی حمایت کے الزامات کو غیر ذمہ دارانہ اور بے بنیاد قرار دیا اور کہا کہ یہ الزام تراشیاں پاکستان کی دہائیوں پر محیط حکمت عملی، قومی صلاحیت اور ادارہ جاتی طاقت کو تسلیم نہ کرنے کا نتیجہ ہیں۔

فیلڈ مارشل نے واضح کیا کہ دو طرفہ تصادم میں تیسرے فریق کو گھسیٹنا بھارت کی ناکام سیاسی چال ہے جو اپنے آپ کو علاقائی محافظ کے طور پر پیش کرنے کی ناکام کوشش کر رہا ہے۔

پاکستان کا دو ٹوک مؤقف اور دفاع کا پختہ عزم

آرمی چیف نے قومی خودمختاری کے تحفظ پر دو ٹوک مؤقف اپناتے ہوئے کہا کہ کسی بھی مہم جوئی یا پاکستان کی خودمختاری پر حملے کی صورت میں فوری، سخت اور غیر متوقع جواب دیا جائے گا۔

انہوں نے واضح کیا کہ اگر دشمن نے شہری مراکز، فوجی تنصیبات یا اقتصادی اثاثوں کو نشانہ بنایا تو اس کا گہرا اور ناقابلِ تصور ردعمل دیا جائے گا۔

بھارت کو خبردار: جارحیت کے نتائج خطرناک ہوں گے

فیلڈ مارشل نے کہا کہ اگر کشیدگی بڑھی تو اس کی ذمہ داری بصیرت سے عاری، تکبر زدہ بھارتی قیادت پر عائد ہوگی جو ایک خودمختار ایٹمی ریاست کے خلاف اشتعال انگیزی کے نتائج کا اندازہ لگانے میں ناکام ہے۔

انہوں نے کہا کہ جنگیں صرف میڈیا کی بیان بازی یا جدید اسلحے سے نہیں جیتی جاتیں بلکہ یہ قومی عزم، ادارہ جاتی مضبوطی، پیشہ ورانہ مہارت اور آپریشنل شفافیت سے لڑی اور جیتی جاتی ہیں۔

مسلح افواج پر مکمل اعتماد، افسران کو رہنمائی

فیلڈ مارشل سید عاصم منیر نے پاکستانی مسلح افواج کی پیشہ ورانہ قابلیت، جنگی تیاری اور قومی جذبے پر مکمل اعتماد کا اظہار کیا اور کورس مکمل کرنے والے افسران کو نصیحت کی۔

ان کا کہنا تھا کہ دیانتداری، بے لوث خدمت اور قوم کے لیے غیر متزلزل عزم پر قائم رہیں۔ یہی ایک افسر کی اصل پہچان ہے۔