وزیراعظم شہباز شریف نے فیلڈ مارشل جنرل عاصم منیر کے صدر مملکت بننے کی خواہش اور صدر مملکت آصف زرداری کے استعفے کی افواہوں کی سختی سے تردید کردی ہے۔

مقامی روزنامے سے گفتگو کرتے ہوئے وزیراعظم شہباز شریف نے ان تمام افواہوں کو بے بنیاد اور قیاس آرائی پر مبنی قرار دیا ہے۔

مزید پڑھیں: صدرآصف زرداری نے کرسچن میریج ترمیمی ایکٹ 2024 کی توثیق کردی

وزیراعظم نے واضح الفاظ میں کہا کہ فیلڈ مارشل عاصم منیر نے کبھی صدر بننے کی خواہش ظاہر کی اور نہ ہی ایسی کوئی تجویز زیر غور ہے، انہوں نے زور دے کر کہا کہ صدر آصف علی زرداری، فیلڈ مارشل عاصم منیر اور وہ خود، تینوں کے درمیان تعلقات باہمی احترام اور پاکستان کی ترقی و خوشحالی کے مشترکہ عزم پر مبنی ہیں۔

وزیرا عظم شہباز شریف نے یقین دہانی کرائی کہ میڈیا کے بعض حلقوں میں صدر آصف علی زرداری کے استعفے سے متعلق گردش کرنے والی ایسی خبروں میں کوئی صداقت نہیں ہے۔

مزید پڑھیں: کسانوں کے مفادات کے تحفظ کیلئے اقدامات کی ضرورت ہے، صدر آصف زرداری

 وزیراعظم کی یہ وضاحت ایسے وقت سامنے آئی ہے جب وفاقی وزیر داخلہ محسن نقوی نے آفیشل ایکس (سابقہ ٹوئٹر) پر بیان جاری کرتے ہوئے صدر زرداری، وزیراعظم شہباز شریف اور آرمی چیف کیخلاف چلائی جانے والی مہم کو ’’منظم سازش‘‘ قرار دے کر اس کی شدید مذمت کی۔

عسکری قیادت سے قریب سمجھے جانے والے محسن نقوی کا کہنا تھا کہ ہمیں بخوبی علم ہے کہ اس منظم مہم کے پیچھے کون ہے، میں واضح کر چکا ہوں کہ صدر سے استعفیٰ لینے یا چیف آف آرمی اسٹاف کے صدر بننے کے بارے میں کوئی بات ہوئی ہے اور نہ ہی ایسی کوئی سوچ موجود ہے۔