پاکستان تحریک انصاف (پی ٹی آئی) کے سینیٹ انتخابات کے لیے نامزد پانچ ناراض امیدواروں میں سے چار نے انتخابی دوڑ سے دستبرداری کا اعلان کر دیا ہے۔

تفصیلات کے مطابق عرفان سلیم، عائشہ بانو، ارشاد حسین اور وقاص اورکزئی نے سینیٹ الیکشن میں حصہ نہ لینے کا فیصلہ کیا ہے، جب کہ پانچویں امیدوار خرم ذیشان نے انتخابی دوڑ میں شامل رہنے پر اصرار کرتے ہوئے دستبرداری سے انکار کر دیا ہے۔

مزید پڑھیں: کے پی سینیٹ الیکشن؛ پیپلزپارٹی نے اپوزیشن جماعتوں کو اہم مشورہ دے دیا

ارشاد حسین نے الیکشن کمیشن کو باضابطہ خط لکھ کر اپنے کاغذاتِ نامزدگی واپس لینے کی درخواست بھی دے دی ہے۔

نجی ٹی وی سے گفتگو میں ارشاد حسین نے کہا کہ خرم ذیشان کے سوا باقی تمام ناراض امیدوار دستبردارہو گئے ہیں۔

وقاص اورکزئی کا کہنا تھا کہ کاغذات واپس لینے کا مقصد یہ نہیں کہ اپنے نظریے سے پیچھے ہٹا، بیرسٹرگوہر،سلمان اکرم راجا نے یقین دلایا کہ نام بانی پی ٹی آئی نے ہی فائنل کیے۔

مزید پڑھیں: صنم جاوید کو سینیٹ الیکشن لڑنے کی اجازت دینے کا تحریری فیصلہ

واضح رہے کہ اتوار کو خیبرپختونخوا اسمبلی کی مخصوص نشستوں پر کامیاب 25 ارکان نے حلف اٹھالیا۔

مخصوص نشستوں پر ارکان کی حلف برداری کے بعد خیبر پختونخوا کا ایوان مکمل  اور سینیٹ الیکشن کے لیے الیکٹورل کالج پورا ہوگیا۔

اب سینیٹ کی 11 نشستوں پر انتخاب آج ہوگا جس میں 25 امیدوار میدان میں ہوں گے۔ پی ٹی آئی حکومت اور اپوزیشن مل کر تحریک انصاف کے  ناراض امیدوار کے خلاف الیکشن لڑیں گے، معاہدے کے تحت6 نشستیں حکومت جبکہ 5  اپوزیشن کو ملیں گی ۔

انتخاب میں 145 ارکان اسمبلی ووٹ کاسٹ کریں گے۔