کوروناوائرس کے پھیلاؤ کو روکنے کے لیے سندھ حکومت نے جمعہ کوصوبے میں مکمل لاک ڈاؤن کا اعلان کردیا۔

تفصیلات کے مطابق سندھ حکومت جانب سے کورونا وائرس کے پیش نظر عوام کی حفاظت کے لئے ایک اور بڑا فیصلہ کرلیا گیا جس کے مطابق جمعہ کے روز دوپہر 12 سے 3 بجے تک لاک ڈاؤن کو مزید سخت کرنے کے احکامات جاری کردیئے گئے ہیں۔

محکمہ داخلہ کی جانب سے جاری بیان کے مطابق جمعہ کو دوپہر 12 سے سہ پہر 3 بجے تک مکمل لاک ڈاؤن ہوگا اور لاک ڈاؤن کے دوران کوئی دکان کھلے گی نہ ٹرانسپورٹ چلے گی، جبکہ شہریوں کو نقل و حرکت کی بھی اجازت نہیں ہوگی۔

بیان میں یہ بھی کہا گیا کہ صرف ایمرجنسی کی صورت میں سڑک پر آیا جاسکے گا اور کسی بھی قسم کی مذہبی تقریب و اجتماع کی بھی اجازت نہیں ہوگی۔

سندھ حکومت نے جمعہ کی نماز پر پابندی کا اعلان کردیا

دوسری جانب وزیر اعلیٰ سندھ سید مراد علی شاہ نے میڈیا سے گفتگو کرتے ہوئے کہا کہ میں نے پولیس کو ہدایت کردی ہے کہ مساجد میں کوئی سختی نہ کرے لیکن عوام سے یہی اپیل ہے کہ کل ہم دوبارہ دوپہر 12 سے 3 بجے تک سڑکوں پر سب بند کردیں گے

سید مراد علی شاہ نے یہ بھی کہا کہ مساجد کھلی رہیں گی جہاں متعین افراد نماز ادا کریں گے، باقی لوگوں سے یہی درخواست ہے کہ گھروں پر نماز ادا کریں۔

وزیر اعلیٰ سندھ سید مراد علی شاہ نے مزید کہا کہ جس طرح کاروبار اور اداروں کے لیے ایس او پیز بنائی ہیں اسی طرح ہفتہ کو مساجد کے لیے بھی ایس او پیز کو حتمی شکل دیں گے۔

یادرہے کہ اس سے قبل گز شتہ دو ہفتوں سے کورونا وائرس کے پیش نظر عوام کی حفاظت کے لئے  سندھ حکومت نے نماز جمعہ کے اجتماع کو محدود رکھنے اور دوپہر 12 بجے سے سہ پہر 3 بجے تک مکمل لاک ڈاؤن کا اعلان کیا تھا۔