اسلام آباد: ایران کے صدر مسعود پزشکیان اور وزیراعظم شہباز شریف کے درمیان ون آن ون ملاقات ہوئی ہے۔

ذرائع کے مطابق ملاقات میں پاک ایران باہمی تعلقات کو مزید مستحکم کرنے پر بات چیت کی گئی اور علاقائی سلامتی اور مشرق وسطیٰ کی صورتحال پر تفصیلی تبادلہ بھی خیال کیا گیا۔

ایرانی صدر نے ایران اسرائیل جنگ کے دوران پاکستان کی دو ٹوک حمایت پر پاکستانی قیادت اور عوام کا شکریہ ادا بھی کیا۔

ایرانی صدر کا پرتپاک استقبال

اس سے قبل ایرانی مسعود پزشکیان کا وزیرِاعظم ہاؤس پہنچنے پر وزیراعظم محمد شہباز شریف نے پرتپاک استقبال کیا، دونوں رہنماؤں نے گرمجوشی سے مصافحہ کیا، جس کے بعد رسمی خیرمقدمی تقریب کا انعقاد کیا گیا۔

استقبالیہ تقریب کے دوران پاکستان اور ایران کے قومی ترانے بجائے گئے جبکہ پاک افواج کے چاق و چوبند دستے نے ایرانی صدر کو گارڈ آف آنر پیش کیا، صدر مسعود پزشکیان نے گارڈ آف آنر کا معائنہ کیا اور اس اعزاز پر شکریہ ادا کیا۔

وزیراعظم شہباز شریف نے ایرانی صدر کا استقبال کرتے ہوئے اپنی کابینہ کے ارکان سے تعارف کروایا جبکہ صدر پیزشکیان نے بھی اپنے وفد کے اراکین کا وزیراعظم سے تعارف کروایا۔

اسلام آباد میں آج مصروف ترین دن

ذرائع کے مطابق صدر پزشکیان آج صدرِ پاکستان آصف علی زرداری سے بھی ملاقات کریں گے جس کے بعد دونوں ممالک کے درمیان وفود کی سطح پر مذاکرات کا انعقاد بھی ہوگا۔

آج پاکستان اور ایران کے مابین مختلف شعبہ جات میں تعاون پر مبنی اعلیٰ سطح اجلاس ہوں گے، جن میں باہمی تجارت، سرحدی سیکیورٹی، توانائی اور علاقائی تعاون جیسے امور زیرِ بحث آئیں گے۔

ذرائع کا مزید کہنا ہے کہ اس اہم دورے سے پاکستان اور ایران کے درمیان برادرانہ تعلقات مزید مستحکم ہوں گے اور دوطرفہ تعاون کے نئے در وا ہوں گے۔

یاد رہے کہ یہ ایرانی صدر ڈاکٹر مسعود پزشکیان کا بطور صدر پاکستان کا پہلا سرکاری دورہ ہے، جسے دونوں ممالک کے درمیان تعلقات کے فروغ کے لیے اہم پیش رفت قرار دیا جارہا ہے۔