بنگلہ دیش کے عبوری سربراہ محمد یونس نے سابق وزیر اعظم شیخ حسینہ کے اقتدار کے خاتمے کی پہلی سالگرہ پر قوم سے اتحاد اور اصلاحات کی اپیل کی ہے۔

نوبل انعام یافتہ عبوری وزیراعظم محمد یونس نے عوام پر زور دیا کہ وہ انقلاب کی کامیابیوں کا دفاع کریں اور خبردار کیا کہ پچھلی حکومت کے وفادار عناصر تبدیلی کے عمل کو سبوتاژ کرنے کی کوشش کر رہے ہیں۔ انھوں نے کہا کہ سیاسی و انتخابی اصلاحات پر بات چیت جاری ہے اور ملک کو مستقبل سنوارنے کا نادر موقع ملا ہے جسے ضائع نہیں ہونے دینا چاہیے۔

مزید پڑھیں: بنگلہ دیش کے نئے کرنسی نوٹوں سے شیخ مجیب الرحمٰن کی تصویر غائب، مگر کیوں؟ جانیے

اپنے ایک بیان میں محمد یونس نے ملک میں گزشتہ برس طلبہ تحریک کے ذریعے سابق وزیر اعظم شیخ حسینہ کے 15 سالہ اقتدار کے خاتمے کے موقع پر قوم سے اتحاد اور وسیع پیمانے پر اصلاحات کی اپیل کی ہے۔ انہوں نے کہا کہ ہم نے طویل فسطائی حکومت کے چنگل سے اپنے پیارے وطن کو نجات دلائی ہے۔

محمد یونس نے ان عناصر کے بارے میں خبردار کیا جو حسینہ حکومت کے حامی رہے اور اب تبدیلی کے عمل کو نقصان پہنچانے کی کوشش کر رہے ہیں۔ انھوں نے کہا کہ شکست خوردہ ڈکٹیٹرز کے خود غرض اتحادی آج بھی سازشوں میں مصروف ہیں۔”

انھوں نے اس بات پر زور دیا کہ عبوری حکومت نے انسانی حقوق کے تحفظ، ادارہ جاتی شفافیت اور قانون کی حکمرانی کے لیے اقدامات شروع کیے ہیں، لیکن انتخابی اور سیاسی نظام سے متعلق بنیادی اصلاحات پر مشاورت بدستور جاری ہے۔

مزید پڑھیں: معزول بنگلہ دیشی وزیراعظم حسینہ واجد کے اہم وزیر کی لندن میں جائیدادیں ضبط

ملک میں عام انتخابات 2026 کے اوائل میں متوقع ہیں اور سیاسی جماعتوں کے درمیان اقتدار کے حصول کی دوڑ بھی جاری ہے۔ یونس نے عوام سے اپیل کی کہ وہ ملک کے روشن مستقبل کے لیے اس تاریخی موقع کو ضائع نہ ہونے دیں۔

واضح رہے کہ بنگلہ دیش کے عبوری وزیر اعظم محمد یونس آج شام پارلیمنٹ کے باہر عوامی اجتماع سے اہم خطاب کریں گے۔ اس موقع پر وہ ملک کی سیاسی قیادت کے ہمراہ ایک باضابطہ اعلامیہ بھی جاری کریں گے، جس میں اصلاحات اور جمہوری عمل کے تسلسل پر زور دیا جائے گا۔

اس تقریب میں بڑی سیاسی جماعتوں کے رہنما بھی موجود ہوں گے اور ممکنہ طور پر آئندہ کے سیاسی روڈ میپ کے خدوخال پیش کیے جائیں گے۔