پاکستان نے سندھ طاس معاہدے کی عمومی تشریح کے حوالے سے ثالثی عدالت کے حالیہ فیصلے کا پر زور خیرمقدم کیا ہے، جس میں بھارت کی مغربی دریاؤں پر غیر قانونی رَن آف رِور ہائیڈرو منصوبوں کی تعمیر پر سخت پابندیاں عائد کی گئی ہیں۔

عدالت نے واضح کیا ہے کہ بھارت کو پاکستان کو بلا روک ٹوک پانی فراہم کرنا ہوگا اور معاہدے کی خلاف ورزی کرنے والی کوئی رعایت قبول نہیں کی جائے گی۔

 یہ فیصلہ بھارت کے غیر ذمہ دارانہ اور معاہدے شکن رویے کے خلاف ایک اہم قانونی فتح ہے۔

واضح رہے کہ 8 اگست 2025 کو سندھ طاس معاہدے کی عمومی تشریح سے متعلق ثالثی عدالت کا فیصلہ عدالت کی ویب سائٹ پر جاری کر دیا گیا، جسے پاکستان نے ایک اہم قانونی کامیابی قرار دیا ہے۔

 دفتر خارجہ کے ترجمان نے کہا کہ یہ فیصلہ بھارت کی جانب سے مغربی دریاؤں پر جاری غیر قانونی رَن آف رِور ہائیڈرو پاور منصوبوں کی تعمیر کے لیے طے کردہ معیارات کی واضح نفی کرتا ہے۔

ترجمان نے بتایا کہ عدالت نے بھارت کو ہدایت کی ہے کہ وہ سندھ طاس معاہدے کے تحت پاکستان کو مغربی دریاؤں کے پانی کا بلا رکاوٹ استعمال فراہم کرے، اور پن بجلی کے لیے دی گئی مخصوص رعایتیں معاہدے کی مکمل پاسداری کے مطابق ہونی چاہئیں۔

بھارت کی جانب سے پیش کیے گئے “آئیڈیل” یا “بہترین عملی طریقہ” کی بنیاد پر کوئی رعایت قابل قبول نہیں۔

عدالت نے بھارت کی کوششوں کو مسترد کرتے ہوئے کم درجے کے آؤٹ لیٹس، گیٹڈ اسپِل ویز، اور ٹربائنز کے لیے پانی کے انٹیک اور فری بورڈ کی تشریحات پاکستان کے موقف کے حق میں دی ہیں۔

مزید برآں، عدالت نے بھارت کو مغربی دریاؤں کے آبی ذخائر کی گنجائش میں غیر قانونی اضافہ کرنے سے بھی روکا ہے، جو معاہدے کی سنگین خلاف ورزی ہے۔

دفتر خارجہ کے ترجمان نے کہا کہ یہ فیصلہ دونوں فریقین کے لیے حتمی اور لازمِ الاتباع ہے اور مستقبل کی ثالثی عدالتوں اور غیر جانبدار ماہرین کے لیے بھی ایک قانونی معیار قائم کرتا ہے۔

عدالت نے پاکستان کو بطور ڈاؤن اسٹریم ریاست کے درپیش مسائل تسلیم کرتے ہوئے کہا کہ سندھ طاس معاہدے کا بنیادی مقصد دونوں ممالک کے حقوق اور ذمہ داریوں کی واضح تفہیم اور تنازعات کے پرامن حل کو یقینی بنانا ہے۔

پاکستان حکومت سندھ طاس معاہدے کے مکمل نفاذ کے لیے پرعزم ہے اور توقع رکھتی ہے کہ بھارت جلد از جلد معاہدے کی خلاف ورزی بند کرے گا اور ثالثی عدالت کے فیصلے پر مکمل ایمانداری سے عمل درآمد کرے گا۔