راولپنڈی: جی ایچ کیو میں پاک فوج کے آرمی چیف فیلڈ مارشل سید عاصم منیر اور آذربائیجان آرمی کے چیف آف جنرل اسٹاف کرنل جنرل کریم ولیئیف کے درمیان ایک اہم ملاقات ہوئی، جس میں دوطرفہ عسکری تعاون، علاقائی و عالمی سیکیورٹی صورتحال، اور باہمی دلچسپی کے دیگر امور پر تفصیلی تبادلہ خیال کیا گیا۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف نے آذربائیجان اور آرمینیا کے درمیان امن معاہدے کی کامیاب تکمیل پر کرنل جنرل کریم ولیئیف کو مبارکباد دی اور اس معاہدے کو خطے میں پائیدار امن کے لیے ایک اہم سنگِ میل قرار دیا۔

 اس موقع پر کرنل جنرل کریم ولیئیف نے پاک فوج کی پیشہ ورانہ صلاحیتوں اور معرکۂ حق میں ان کی کامیابیوں کو خراج تحسین پیش کیا۔

آذربائیجانی وفد نے پاکستان کے یوم آزادی اور جشنِ فتح کی تقریبات کے حوالے سے نیک خواہشات کا اظہار کیا، جس پر فیلڈ مارشل عاصم منیر نے آذربائیجان کی قیادت اور عوام کا شکریہ ادا کیا، خاص طور پر پاکستان میں ہونے والی یوم آزادی کی تقریبات میں آذربائیجانی دستے کی شرکت پر اپنی قدردانی کا بھی اظہار کیا۔

ملاقات کے دوران کرنل جنرل کریم ولیئیف نے دہشت گردی کے خلاف پاکستان کے مؤثر کردار کو سراہا اور پاک آذربائیجان تعلقات کو دوطرفہ تعاون اور علاقائی امن و استحکام کے فروغ کے لیے مثالی قرار دیا۔

اس موقع پر آذربائیجان کے صدر الہام علییف کی جانب سے کرنل جنرل کریم ولیئیف نے آرمی چیف جنرل عاصم منیر کو “پیٹریاٹک وار میڈل” پیش کیا، جو عسکری تعاون میں نمایاں خدمات کے اعتراف میں دیا گیا۔

آئی ایس پی آر کے مطابق اس اعزاز کی تقریب کے دوران جی ایچ کیو میں پاک فوج کے دستے نے آذربائیجانی آرمی چیف کو گارڈ آف آنر بھی پیش کیا۔

ملاقات کے اختتام پر دونوں فریقین نے دو طرفہ تعلقات کو مزید مضبوط بنانے اور باہمی تعاون کو فروغ دینے کے عزم کا اعادہ کیا۔