پاکستان کی 78ویں سالگرہ کے پرمسرت موقع پر مسلح افواج نے پوری قوم کو دل کی گہرائیوں سے مبارکباد پیش کی ہے۔

ترجمان آئی ایس پی آر کا کہنا ہے کہ یہ دن نہ صرف آزادی کی خوشی کا مظہر ہے بلکہ قومی اتحاد، قربانی اور روشن مستقبل کے مشترکہ وژن کی علامت بھی ہے۔

آئی ایس پی آر کے مطابق چیف آف آرمی اسٹاف فیلڈ مارشل عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، چیف آف نیول اسٹاف ایڈمرل نوید اشرف اور چیف آف ایئر اسٹاف ایئر چیف مارشل ظہیر احمد بابر نے اپنے مشترکہ پیغام میں کہا کہ 14 اگست ہمیں ان عظیم قربانیوں کی یاد دلاتی ہے جو ہمارے آبا و اجداد نے آزادی کے لیے دی تھیں۔

آئی ایس پی آر کے مطابق قائداعظم محمد علی جناح کی بصیرت، عزم، اور بے مثال قیادت نے برصغیر کے مسلمانوں کو ایک آزاد وطن کا خواب دکھایا، جسے قربانیوں اور جدوجہد کے ذریعے حقیقت کا روپ دیا گیا، ان کے اصول، نظریات، اور آزادی کے مقصد پر اٹل یقین آج بھی ہمارے لیے مشعلِ راہ ہیں۔

مسلح افواج نے قوم کے ہر فرد، خاص طور پر بانیانِ پاکستان، رہنماؤں اور سپاہیوں کو خراجِ عقیدت پیش کرتے ہوئے اس عزم کا اعادہ کیا کہ ہم آئین کی پاسداری کریں گے اور ان اقدار کا دفاع کریں گے جو ہماری قومی شناخت کی بنیاد ہیں۔

ترجمان پاک فوج نے کہا کہ عوام اور افواجِ پاکستان کے درمیان ناقابلِ شکست رشتہ ہماری اجتماعی طاقت کا مظہر ہے اور یہ تعلق قومی استحکام کا ضامن ہے۔

آئی ایس پی آر نے یومِ آزادی کے موقع پر اس عزم کا اظہار بھی کیا کہ پوری قوم مل کر امن، ترقی اور اتحاد کے راستے پر گامزن رہے گی تاکہ پاکستان کو ایک مضبوط اور خوشحال ملک بنایا جا سکے۔