پشاور: خیبر پختونخوا میں گزشتہ 24 گھنٹوں کے دوران شدید بارشوں اور فلش فلڈ کے باعث مختلف حادثات میں 157 افراد جاں بحق اور متعدد زخمی ہوگئے ہیں۔

خیبر پختونخوا کے مختلف اضلاع، گلگت بلتستان اور آزاد کشمیر میں کلاؤڈ برسٹ، لینڈ سلائیڈنگ اور سیلابی ریلوں نے بڑے پیمانے پر تباہی مچادی ہے۔

مختلف حادثات میں اب تک 157 افراد جاں بحق اور متعدد زخمی ہوگئے ہیں جب کہ باجوڑ میں بارشوں سے متاثرہ علاقوں کے لئے امدادی سامان لے جانے والا صوبائی حکومت کا ایم آئی 17 ہیلی کاپٹر بھی خراب موسم کی وجہ سے تباہ ہوگیا ہے۔

وزیر اعلیٰ خیبرپختونخوا علی امین گنڈاپور کے مطابق اس افسوسناک حادثے کے نتیجے میں عملے سمیت 5 افراد شہید ہوگئے ہیں۔

سیلاب سے جانی و مالی نقصانات کی تفصیل

صوبائی ڈیزاسٹر مینجمنٹ اتھارٹی (پی ڈی ایم اے) کے مطابق جاں بحق ہونے والوں میں 137 مرد، 8 خواتین اور 12 بچے شامل ہیں جب کہ زخمیوں میں مرد اور خواتین سمیت بچے بھی شامل ہیں۔

پی ڈی ایم اے کی ابتدائی رپورٹ میں بتایا گیا ہے کہ بارشوں اور سیلاب سے مجموعی طور پر 35 مکانات کو نقصان پہنچا جن میں 28 جزوی طور پر اور 7 مکمل طور پر تباہ ہوئے۔

متاثرہ اضلاع میں سوات، بونیر، باجوڑ، تورغر، دیر اپر و لوئر، مانسہرہ، شانگلہ اور بٹگرام شامل ہیں جب کہ بونیر، باجوڑ اور بٹگرام سب سے زیادہ متاثرہ اضلاع ہیں جن میں ریسکیو آپریشن تاحال جاری ہے۔

پاک فوج کا فلڈ ریلیف آپریشن

پاک فوج کا سوات اور باجوڑ کے سیلاب سے متاثرہ علاقوں میں ریلیف آپریشن جاری ہے اور پاک فوج کی ٹیمیں متاثرہ اضلاع میں امدادی سرگرمیوں میں مصروف ہیں۔

سوگ کا اعلان

خیبرپختونخوا حکومت نے جانی نقصان پرکل صوبے بھر میں سوگ منانے کا اعلان کیا ہے۔ وزیر اعلیٰ کے مطابق کل صوبے میں قومی پرچم سرنگوں رہے گا۔

21 اگست تک وقفے وقفے سے بارش کی پیشگوئی

پی ڈی ایم اے نے کہا کہ شدید بارشوں کا سلسلہ 21 اگست تک وقفے وقفے سے جاری رہنے کا امکان ہے، اس لیے تمام ضلعی انتظامیہ کو پیشگی اقدامات کی ہدایت جاری کردی گئی ہیں۔

متاثرہ علاقوں میں امدادی سرگرمیاں تیز کرنے، سیاحتی مقامات پر بند شاہراہوں اور رابطہ سڑکوں کی بحالی کے لیے تمام وسائل بروئے کار لانے کی ہدایت بھی کی گئی ہے۔

عوام سے اپیل کی گئی ہے کہ کسی بھی ہنگامی صورتحال، موسمی معلومات یا اطلاع کے لیے پی ڈی ایم اے کی فری ہیلپ لائن 1700 پر رابطہ کریں۔