خیبرپختونخوا، گلگت بلتستان اور کشمیر میں سیلاب اور طوفانی بارشوں سے تباہی کا سلسلہ جاری ہے، جس کے نتیجے میں اب تک 152 افراد جان سے ہاتھ دھو بیٹھے ہیں، جبکہ ریسکیو میں مصروف صوبائی حکومت کا ہیلی کاپٹر بھی گر کر تباہ ہو گیا جس میں مزید 5 افراد جاں بحق ہو گئے۔

وزیراعظم شہباز شریف نے فوری طور پر ہنگامی اجلاس طلب کر لیا ہے، جس میں چیئرمین این ڈی ایم اے وزیراعظم کو صورتحال پر بریفنگ دیں گے۔

خیبر پختونخواہ میں سیلاب، طوفانی بارشوں اور لینڈ سلائیڈنگ نے قیامت برپا کر رکھی ہے، جبکہ امدادی کارروائیوں کے دوران صوبائی حکومت کا ہیلی کاپٹر بھی حادثے کا شکار ہو گیا۔ اس سانحے میں ہیلی کاپٹر میں سوار پانچ افراد جاں بحق ہو گئے۔

مزید پڑھیں: خیبر پختونخوا؛ بارشوں اور سیلاب سے 157 افراد جاں بحق، صوبائی حکومت کا ہیلی کاپٹر تباہ، یومِ سوگ کا اعلان

وزیراطلاعات عطاتارڑ نے بتایا کہ وزیراعظم شہباز شریف سیلابی صورتحال سے مکمل طور پر آگاہ ہیں اور انہوں نے این ڈی ایم اے کو بارشوں اور سیلاب متاثرہ علاقوں میں بھرپور امدادی کارروائیاں جاری رکھنے کی ہدایت دی ہے۔

 این ڈی ایم اے کو خیبر پختونخواہ اور آزاد کشمیر کی حکومتوں سے مسلسل رابطہ رکھنے کا بھی حکم دیا گیا ہے۔

وزیراعظم ہاؤس میں خصوصی سیل قائم کر دیا گیا ہے جو این ڈی ایم اے سے 24 گھنٹے رابطے میں رہے گا۔ عطاتارڑ نے مزید کہا کہ وزیراعظم نے تین بار این ڈی ایم اے کا دورہ کیا ہے اور ریسکیو اقدامات کا جائزہ لیا۔

پاک فوج نے بھی سوات اور باجوڑ میں فلڈ ریلیف آپریشن شروع کر دیا ہے، جہاں فوجی ٹیمیں سیلاب سے متاثرہ علاقوں میں امدادی سرگرمیوں میں مصروف ہیں۔

مزید پڑھیں: ہیلی کاپٹر حادثے کے شہداء کی قربانی، وزیر اعلیٰ خیبر پختونخواہ نے سوگ کا اعلان کر دیا

حکومت کی توجہ اس وقت ریلیف اور ریسکیو اقدامات پر مرکوز ہے، اور تمام وسائل سیلاب متاثرین کی مدد کے لیے بروئے کار لائے جا رہے ہیں۔

وزارت اطلاعات نے اعلان کیا کہ این ڈی ایم اے کا کمانڈ اینڈ کنٹرول سینٹر 24 گھنٹے فعال ہے اور انسانوں کی جانیں محفوظ بنانے کے لیے اقدامات کیے جا رہے ہیں۔