خیبر پختونخوا میں بارشوں کا نیا سلسلہ خطرے کی گھنٹی بن گیا، پی ڈی ایم اے نے ممکنہ گلاف (گلیشیئر لیک آؤٹ برسٹ فلڈ) کے پیش نظر الرٹ جاری کر دیا۔

چترال، دیر، سوات اور کوہستان کے گلیشیائی علاقوں میں جھلیں پھٹنے کا خطرہ بڑھ گیا ہے۔

پی ڈی ایم اے کے مطابق صوبے کے بالائی اور گلیشیائی علاقوں میں وقفے وقفے سے تیز بارشوں کا امکان ہے، جس کے باعث گلیشیائی جھیلوں کے پھٹنے کے واقعات پیش آ سکتے ہیں۔

چترال اپر و لوئر، دیر، سوات، اور اپر کوہستان کے رہائشیوں اور سیاحوں کو خاص طور پر محتاط رہنے کی ہدایت جاری کی گئی ہے۔

ادارے نے ضلعی انتظامیہ کو ہدایت دی ہے کہ حساس مقامات کی نگرانی، بروقت وارننگ سسٹم کی فعالیت، انخلا کی مشقیں، اور ہنگامی اقدامات کو یقینی بنایا جائے۔

اہم ہدایات:

ندی نالوں کے قریب غیر ضروری نقل و حرکت سے گریز کریں

تیز بہاؤ والے پانی میں گاڑیاں لے جانے سے اجتناب کریں

ممکنہ متاثرہ علاقوں میں انخلا کے لیے مقامات تیار رکھے جائیں

ریسکیو ٹیمیں اور ہنگامی سامان الرٹ رہیں

سیاحوں کو خاص طور پر محتاط رہنے اور محفوظ مقامات پر قیام کی ہدایت

مزید برآں، این ایچ اے، ایف ڈبلیو او اور سی اینڈ ڈبلیو کو سڑکوں کی بحالی کے لیے فوری اقدامات کی ہدایت جاری کی گئی ہے تاکہ کسی بھی ممکنہ بندش یا حادثے سے بچا جا سکے۔

پی ڈی ایم اے نے عوامی سطح پر آگاہی مہم کا آغاز بھی کر دیا ہے تاکہ شہری ممکنہ خطرات سے بچاؤ کے لیے پیشگی اقدامات کر سکیں۔ کسی بھی ایمرجنسی کی اطلاع یا معلومات کے لیے شہری 1700 پر رابطہ کر سکتے ہیں۔