اسحاق ڈار کی بنگلہ دیش میں سیاسی جماعتوں کے وفود سے ملاقاتیں،دوطرفہ تعلقات پرتبادلہ خیال کیاگیا۔

نائب وزیراعظم و وزیر خارجہ نے بنگلادیش کے مختلف سیاسی جماعتوں کے وفود سے پاکستانی ہائی کمیشن میں ملاقاتیں کیں۔

ترجمان دفتر خارجہ کے مطابق اس موقع پر نیشنل سٹیزن پارٹی (این سی پی) کے وفد نے نائب وزیراعظم اسحاق ڈار سے ملاقات کی، جس کی قیادت پارٹی کے ممبر سیکریٹری اختر حسین کررہے تھے۔

اسی طرح جماعتِ اسلامی بنگلادیش کے وفد نے بھی عبداللہ محمد طاہر کی سربراہی میں اسحاق ڈار سے ملاقات کی۔

بیان میں کہا گیا کہ ملاقاتوں میں پاک بنگلہ دیش تعلقات کو مزید مضبوط بنانے اور خطے کی تازہ سیاسی صورتحال پر تبادلہ خیال کیا گیا۔ اسحاق ڈار نے مشکل حالات میں جماعتِ اسلامی بنگلادیش کی ثابت قدمی کو سراہتے ہوئے اسے حوصلہ افزا قرار دیا۔

ترجمان کے مطابق بعدازاں بنگلادیش نیشنلسٹ پارٹی (بی این پی) کا وفد بھی ہائی کمیشن پہنچا، جہاں سیکریٹری جنرل مراز فخرالاسلام کی قیادت میں اسحاق ڈار سے ملاقات کی گئی۔

واضح رہے کہ وزیر خارجہ اسحاق ڈار 2 روزہ سرکاری دورے پر آج بنگلہ دیش پہنچے ہیں۔ یہ دورہ اس لحاظ سے اہمیت کا حامل ہے کہ 13 برس بعد کسی پاکستانی وزیر خارجہ نے بنگلادیش کا دورہ کیا ہے۔