اسلام آباد: وزیراعظم محمد شہباز شریف نے گلگت بلتستان میں سیکڑوں جانیں بچانے والے چرواہوں کو 25، 25 لاکھ روپے کا انعام پیش کردیا۔

وزیراعظم شہباز شریف سے گلگت بلتستان کے علاقے غذر کے تین چرواہوں وصیت خان، انصار اور محمد خان نے ملاقات کی، جنہوں نے حالیہ گلوف (گلیشیائی جھیل پھٹنے) کے خطرے کی بروقت اطلاع دے کر سیکڑوں انسانی جانیں بچائیں تھیں۔

وزیراعظم نے تینوں چرواہوں کی جرات اور انسانیت کے لیے ان کے احسن اقدام کو خراجِ تحسین پیش کیا اور کہا کہ آپ گلگت بلتستان کے ہیروز ہیں، پوری پاکستانی قوم کو آپ پر فخر ہے۔

25  لاکھ روپے انعامی چیکس کی تقسیم

وزیراعظم نے وصیت خان، انصار اور محمد خان کو حکومتِ پاکستان کی جانب سے 25، 25 لاکھ روپے کے انعامی چیکس بھی پیش کیے اور کہا کہ انسانی خدمت کا یہ جذبہ ہمیشہ سنہری الفاظ میں یاد رکھا جائے گا۔

وزیراعظم شہباز شریف نے کہا کہ ان کی بروقت اطلاع کے باعث علاقے کو خالی کروا لیا گیا جس سے کم از کم 300 شہریوں کی زندگیاں بچیں۔

انہوں نے مزید کہا کہ وزارتِ موسمیاتی تبدیلی گلگت بلتستان میں پیشگی اطلاعات کے نظام کو بہتر بنانے پر تیزی سے کام کر رہی ہے تاکہ مستقبل میں کسی بھی سانحے سے بچا جاسکے۔

چرواہوں کا اظہارِ تشکر

وصیت خان، انصار اور محمد خان نے وزیراعظم کی جانب سے پذیرائی اور انعام پر شکریہ ادا کیا۔

اس موقع پر ان کا کہنا تھا کہ اللہ کے فضل و کرم سے وہ انسانی جانیں بچانے میں کامیاب ہوئے جس پر وہ شکر گزار ہیں جب کہ ملاقات میں وزیر اطلاعات و نشریات عطاء اللہ تارڑ بھی شریک تھے۔