ایتھوپین فضائیہ کے کمانڈر لیفٹیننٹ جنرل یلما مرداسا نے ایئر ہیڈ کوارٹرز اسلام آباد کا دورہ کیا جہاں انہوں نے سربراہ پاک فضائیہ ایئر چیف مارشل ظہیر احمد بابر سدھو سے ملاقات کی۔

پاک فوج کے شعبہ تعلقات عامہ (آئی ایس پی آر) کے مطابق دورے کا مقصد دونوں ممالک کے درمیان فضائی تعاون کو وسعت دینا اور عسکری شراکت داری کو فروغ دینا تھا۔

دورے کے آغاز پر لیفٹیننٹ جنرل یلما مرداسا کو پاک فضائیہ کے چاق و چوبند دستے نے گارڈ آف آنر پیش کیا۔ بعد ازاں ایئر چیف مارشل ظہیر احمد بابر سدھو سے ملاقات کے دوران پیشہ ورانہ دلچسپی کے مختلف امور پر تبادلہ خیال کیا گیا۔

ایئر چیف نے مشترکہ تربیتی اقدامات اور آپریشنل تعاون کے ذریعے دونوں فضائی افواج کے تعلقات کو مزید مستحکم کرنے کے عزم کا اعادہ کیا۔ انہوں نے کہا کہ پاکستان، ایتھوپیا کے ساتھ اپنے دیرینہ برادرانہ تعلقات کو قدر کی نگاہ سے دیکھتا ہے اور فضائیہ کے مختلف شعبوں میں بھرپور معاونت جاری رکھے گا۔

لیفٹیننٹ جنرل یلما مرداسا نے پاک فضائیہ کی آپریشنل تیاریوں، ملٹی ڈومین صلاحیتوں اور جدید دفاعی حکمت عملی کو سراہا اور کہا کہ ایتھوپین فضائیہ، پاک فضائیہ کے تجربات، کمانڈ سسٹمز اور تکنیکی ترقی سے استفادہ حاصل کرنے کی خواہش رکھتی ہے۔

دورے کے دوران معزز مہمان کو نیشنل آئی ایس آر (Intelligence, Surveillance and Reconnaissance) اینڈ انٹیگریٹڈ ایئر آپریشنز سینٹر اور پی اے ایف سائبر کمانڈ میں بھی جامع بریفنگ دی گئی۔

ایتھوپین ایئر چیف نے پاک فضائیہ کی تکنیکی ترقی، خود انحصاری اور جدید ٹیکنالوجی کے حصول کی کاوشوں کو سراہتے ہوئے دونوں ممالک کے درمیان ہوا بازی کے شعبے میں تعاون کو نئی بلندیوں تک لے جانے کی خواہش کا اظہار کیا۔