اسلام آباد: غیر قانونی ہاؤسنگ سوسائٹیز اور قبضہ مافیا کے خلاف وفاقی وزیر داخلہ محسن نقوی کی زیرو ٹالرنس پالیسی کے مثبت نتائج سامنے آنے لگے۔

بطول نیوز کے مطابق وفاقی وزیر داخلہ و انسداد منشیات محسن نقوی کی زیر قیادت غیر قانونی ہاؤسنگ سوسائٹیز اور تجاوزات کے خلاف زیرو ٹالرنس پالیسی نے اسلام آباد میں مثبت نتائج دینا شروع کر دیے ہیں۔

ان کی ہدایت پر دارالحکومت کو صاف، سرسبز اور ترقی یافتہ بنانے کے لیے جدید ٹیکنالوجی اور سخت نفاذ پر مبنی اقدامات جاری ہیں۔

محسن نقوی، جو اپنی تیز رفتار اور مؤثر پالیسیوں کے باعث محسن اسپیڈ کہلاتے ہیں، نے اسلام آباد میں غیر قانونی تعمیرات اور تجاوزات کے خلاف بلاامتیاز کارروائی کا آغاز کیا۔ اس سلسلے میں سیٹلائٹ میپنگ اور لینڈ انفارمیشن اینڈ مینجمنٹ سسٹم استعمال کیا جا رہا ہے تاکہ خلاف ورزیوں کی نشاندہی اور بروقت کارروائی ممکن بنائی جا سکے۔

اگست 2025 میں سیدپور ماڈل ویلیج آپریشن کے دوران 200 سے زائد غیر قانونی تعمیرات مسمار کی گئیں اور 200 کنال سے زائد نیشنل پارک کی زمین واگزار کرائی گئی۔ یہ اقدام شفاف انداز میں سیاحت اور ثقافت کے فروغ کے لیے علاقے کو ازسرنو ترقی دینے کی جانب ایک اہم قدم قرار دیا گیا۔

مزید برآں، جی ٹی روڈ اور ایکسپریس وے پر بڑے پیمانے پر آپریشن کیے گئے جبکہ سی ڈی اے ہیڈکوارٹرز میں اعلیٰ سطحی اجلاسوں کے دوران تمام سیکٹرز کو مقررہ مدت میں تجاوزات سے پاک کرنے کی ہدایات جاری کی گئیں۔ اس کے ساتھ ساتھ شہر کی جدیدیت کے منصوبے بھی تیز رفتاری سے آگے بڑھائے جا رہے ہیں جن میں ٹی چوک فلائی اوور، شاہین چوک انڈر پاس، ڈپلومیٹک انکلیو کی توسیع اور نئی پولیس اسٹیشنز کا قیام شامل ہے۔

محسن نقوی کی پالیسی کا مقصد صرف تجاوزات کا خاتمہ نہیں بلکہ اسلام آباد کو عالمی معیار کا صاف، سرسبز اور خوبصورت دارالحکومت بنانا ہے۔

وفاقی وزیر داخلہ کا کہنا ہے کہ سخت اقدامات کے ساتھ جدید انفراسٹرکچر اور شفاف حکمرانی ہی ایک پائیدار اور رہنے کے قابل شہر کی ضمانت ہیں۔