ترکیہ نے اسرائیل سے تمام تجارتی تعلقات ختم، فضائی و سمندری حدود بندکردی۔ اردوان حکومت نے اسرائیلی حکومت کے خلاف سخت اقدامات پر عمل شروع کردیا۔

ترک وزیرِ خارجہ حکان فیدان نے جمعے کو پارلیمنٹ کے اجلاس میں خطے کی صورتحال پرسخت اوردوٹوک مؤقف پیش کیا۔

حکان فیدان نے تصدیق کی کہ ترکیہ نے اسرائیل کے ساتھ تمام تجارتی تعلقات ختم کر دیے۔

انہوں نے کہاکہ ترک بحری جہازوں کواسرائیلی بندرگاہوں پر جانے کی اجازت نہیں ہے۔ ان کاکہناتھاکہ ترک فضائی حدود اسرائیلی طیاروں کے لیے بند کر دی گئی ہے۔

انہوں نے کہا کہ اسرائیل گزشتہ 2 برس سے غزہ میں نسل کشی کر رہا ہے۔ ان کے مطابق غزہ میں ہونے والے مظالم انسانی تاریخ کے سیاہ ترین ابواب میں شمار ہوں گے۔

حکان فیدان نے خبردار کیا کہ اسرائیل بے لگام ہوچکاہے۔ان کا کہناتھاکہ حملے جاری رکھنے کی اجازت دینا نہ صرف فلسطینی عوام بلکہ خطے کوآگ کی لپیٹ میں لے سکتاہے۔

انہوں نے کہاکہ فلسطینی عوام کی مزاحمت تاریخ کا دھارا بدلنے کی طاقت رکھتی ہے۔

ترک وزیرِخارجہ نے واضح کہاکہ ترکیہ فلسطینیوں کی غزہ سے بے دخلی کے کسی  منصوبے کوقبول نہیں کرے گا۔

اپنے خطاب میں انہوں نے اسرائیل کے غزہ، لبنان، یمن، شام اور ایران پر حملوں کو ’دہشت گرد ریاست‘ کی ذہنیت قراردیا۔