لاہور: شہر کی پرچون مارکیٹوں میں سبزیوں کی قیمتیں سرکاری نرخنامے کے برعکس زیادہ وصول کی جانے لگی ہیں، جس سے شہری شدید مشکلات کا شکار ہیں۔

بول نیوز کے مطابق لاہور میں مختلف سبزیوں کے نرخوں میں 30 سے 80 روپے فی کلو تک کا فرق ریکارڈ کیا گیا ہے۔

پیاز کی سرکاری قیمت 70 روپے فی کلو مقرر کی گئی ہے لیکن مارکیٹ میں یہ 100 روپے تک فروخت ہورہی ہے۔ اسی طرح ٹماٹر 125 روپے کے بجائے 150 روپے کلو تک دستیاب ہیں۔ لہسن 295 روپے کے بجائے 400 روپے اور ادرک 465 روپے کے بجائے 600 روپے فی کلو تک فروخت کی جا رہی ہے۔

سبز مرچ کی سرکاری قیمت 120 روپے ہے مگر یہ مارکیٹ میں 160 روپے فی کلو میں فروخت ہورہی ہے۔ لیموں (چائنہ) سرکاری طور پر 120 روپے مقرر ہیں لیکن دکاندار 200 روپے فی کلو تک وصول کر رہے ہیں۔ ٹینڈے دیسی 210 روپے کے بجائے 260 روپے اور آلو 85 روپے کے بجائے 120 روپے فی کلو فروخت ہورہے ہیں۔

اسی طرح دیگر سبزیوں میں بھی نمایاں فرق سامنے آیا ہے۔ کھیرا سرکاری نرخ 100 روپے کے مقابلے میں 150 روپے، کریلے 220 روپے کے بجائے 300 روپے، بند گوبھی 110 کے بجائے 160، پھول گوبھی 160 کے بجائے 200 اور شلجم 80 روپے کے بجائے 150 روپے کلو تک بیچے جا رہے ہیں۔

گھیا کدو، گھیا توری، بھنڈی اور شملہ مرچ کی قیمتوں میں بھی سرکاری نرخ سے نمایاں اضافہ ریکارڈ کیا گیا ہے۔

شہریوں نے شکایت کی ہے کہ پرائس کنٹرول کمیٹیاں صرف کاغذی کارروائی تک محدود ہیں جبکہ مارکیٹ میں دکاندار اپنی مرضی سے قیمتیں وصول کر رہے ہیں۔ شہریوں نے حکومت سے فوری ایکشن لینے اور نرخنامے پر سختی سے عملدرآمد کرانے کا مطالبہ کیا ہے۔