بھارتی میڈیا کی جانب سے ایشیا کپ 2025 میں پاکستان کی جانب سے اپنے اسکواڈ میں شامل کیے گئے پانچ نئے چہروں کو بھارت کے لیے بڑا خطرہ قرار دیا جارہا ہے۔

بھارتی میڈیا سے اس حوالے رپورٹ کیا ہے کہ پاکستان کرکٹ بورڈ (پی سی بی) کی جانب جس اسکواڈ کا اعلان کیا گیا ہے اس میں بابر اعظم اور محمد رضوان جیسے بڑے نام شامل نہیں ہیں۔ اس کی قیادت سلمان علی آغا کے سپرد کی گئی ہے اور پانچ نئے چہروں کو شامل کیا گیا ہے جو بھارت کے خلاف بڑے خطرے کے طور پر دیکھے جا رہے ہیں۔

ان نئے کھلاڑیوں میں حسن نواز، صائم ایوب، محمد حارث، صاحبزادہ فرحان اور سفیان مقیم شامل ہیں۔

حسن نواز اپنی جارحانہ بیٹنگ سے شہرت رکھتے ہیں، صائم ایوب بائیں ہاتھ کے بلے باز ہونے کے ساتھ اسپن باؤلنگ بھی کر سکتے ہیں، جبکہ محمد حارث اپنی پر اعتماد اور جارحانہ اننگز کے باعث نمایاں ہیں۔

اسی طرح صاحبزادہ فرحان نے حالیہ ٹی ٹوئنٹی کارکردگی سے متاثر کیا ہے اور لیفٹ آرم رسٹ اسپنر سفیان مقیم پہلے ہی 5/3 کی کارکردگی سے خود کو منوا چکے ہیں۔

ماہرین کا ماننا ہے کہ یہ نئے کھلاڑی پاکستان کو ایک تازہ دم ٹیم کی شکل دے سکتے ہیں جو بھارت جیسی مضبوط حریف کے خلاف فیصلہ کن کردار ادا کرے گی۔

پاکستانی ٹیم کے کوچ مائیکل ہیسن نے وضاحت کی ہے کہ بابر اعظم کو فارمیٹ میں اپنی خامیوں پر کام کرنے کے لیے کہا گیا ہے تاکہ مستقبل میں بہتر تیاری کے ساتھ واپسی کریں۔ سابق کرکٹر عاقب جاوید نے بھی اس اسکواڈ کی حمایت کی ہے اور کہا ہے کہ یہ ٹیم بھارت کے لیے مشکل ثابت ہوگی۔