لاک ڈاون سے پریشان عوام کے لیے سہولت کی صورت میں  اشیائے ضروریہ کی کم قیمت فراہمی کے لیے بلوچستان میں بھی موبائل یوٹیلٹی اسٹورز کا آغاز کردیا گیا۔

 ڈپٹی اسپیکر قومی اسمبلی قاسم سوری نے کوئٹہ میں موبائل یوٹیلٹی اسٹور کا افتتاح کردیا۔ کہتے ہیں بلوچستان میں پچاس ہزار سے زیادہ یوٹیلٹی اسٹور کھولیں گے۔

قاسم سوری کا کہنا تھا بلوچستان میں موبائل یوٹیلٹی اسٹورز سروس کے لیے دس گاڑیاں رکھی گئی ہیںصوبے میں 50 ہزار سے زائد یوٹیلیٹی اسٹورز کھولیں جائیں گے۔

قاسم سوری کا کہنا تھا رمضان پیکج کا جلد اعلان کیا جائے گا۔ عوام کو کھانے پینے کی چیزوں فراہمی کے لیے مزید سبسڈی دیں گے۔

اس سے قبل اسلام آباد میں موبائل یوٹیلٹی اسٹور کا افتتاح وفاقی وزیرمنصوبہ بندی اسد عمر نے کیا تھا جس کے مطابق پہلے مرحلے میں اسلام آباد میں 8 موبائل یوٹیلٹی اسٹورز ہوں گے، دوسرے مرحلے میں ملک کے مختلف حصوں کیلئے موبائل یوٹیلٹی اسٹورز شروع کیے جائیں گے۔

اس موقع پر خطاب کرتے ہوئے وفاقی وزیر اسد عمر نے کہا کہ وزیراعظم نے کھانے پینے کی اشیاء مستحقین تک پہنچانے کی خواہش کا اظہار کیا تھا۔ موبائل یوٹیلٹی اسٹورز کم آمدن طبقے کے گھر تک سامان پہچانے کے لیے ہے، مشکل کی اس گھڑی میں ملک بھر کی ضلعی انتظامیہ پر بہت بوجھ ہے۔

انہوں نے کہا کہ موبائل یوٹیلٹی اسٹورز کا مقصد غریبوں تک اشیاء ضروریہ پہنچانا ہے۔ ابتدائی طور پر اسلام آباد کے دیہی علاقوں میں موبائل اسٹورز سے اشیا فراہم کی جائیں گی، اس مقصد کے لیے 8 موبائل اسٹورز مختص کیے گئے ہیں۔