لاہور: پاکستان کرکٹ بورڈ (پی سی بی) نے باضابطہ اعلان کیا ہے کہ پاکستان، افغانستان اور سری لنکا کے درمیان تین ملکی ٹی20 انٹرنیشنل سیریز کا انعقاد پاکستان میں کیا جائے گا۔

جاری کردہ شیڈول کے مطابق یہ سیریز 17 نومبر سے 29 نومبر تک جاری رہے گی اور اس کا مقصد آئندہ سال شیڈول آئی سی سی ٹی20 ورلڈ کپ کی بھرپور تیاری ہے۔

پی سی بی کے مطابق، یہ پہلا موقع ہے کہ پاکستان تین ملکی ٹی20 سیریز کی میزبانی کرے گا۔ سیریز کے ابتدائی میچ راولپنڈی کرکٹ اسٹیڈیم میں کھیلے جائیں گے، جب کہ باقی مقابلے اور فائنل لاہور کے قذافی اسٹیڈیم میں ہوں گے۔

شیڈول کے مطابق سیریز کا پہلا میچ 17 نومبر کو  پاکستان اور افغانستان کے درمیان راولپنڈی میں کھیلا جائے گا، 19 نومبر کو راولپنڈی میں ہی سری لنکا اور افغانستان مد مقابل ہونگے۔

پاکستان سیریز کا دوسرا میچ 22 نومبر کو سری لنکا  کے خلاف لاہور میں کھیلے گا، 23 نومبر کو  پاکستان اور افغانستان ایک بار پھر لاہور میں ہی مدمقابل ہونگے، 25 نومبر کو سری لنکا اور افغانستان ایک بار پھر لاہور میں ٹکرائیں گے۔

سیریز کا سیکنڈ لاسٹ میچ 27 نومبر کو  پاکستان اور سری لنکا کے درمیان لاہور میں کھیلا جائے گا جبکہ 29 نومبر کوگروپ کی ٹاپ دو ٹیموں کے درمیان فیصلہ کن معرکہ لاہور میں ہوگا۔

پی سی بی کے چیف آپریٹنگ آفیسر سمیر احمد سید نے کہا کہ یہ سیریز نہ صرف کھلاڑیوں کے لیے ورلڈ کپ کی تیاری کا بہترین موقع ہوگی بلکہ شائقین کے لیے بھی بھرپور کرکٹ تفریح لے کر آئے گی۔

ان کے مطابق پاکستان نے حالیہ برسوں میں متعدد بین الاقوامی ایونٹس کی کامیاب میزبانی کی ہے اور یہ سیریز اس تسلسل کو مزید آگے بڑھائے گی۔