شیر شاہ بند میں شگاف کا فیصلہ، لاکھوں کیوسک پانی شہری حدود کی جانب بڑھنے لگا۔

دریائے چناب میں سیلابی صورتحال خطرناک حد تک سنگین ہو گئی ہے، جب کہ ملتان کے لیے آئندہ 48 گھنٹے نہایت اہم اور فیصلہ کن قرار دیے گئے ہیں۔

ہیڈ محمد والا اور شیر شاہ کے مقامات پر پانی کی سطح میں مسلسل اضافہ ریکارڈ کیا جا رہا ہے، اور محکمہ آبپاشی نے ہنگامی فیصلے لیتے ہوئے شیر شاہ بند میں شگاف ڈالنے کا اعلان کر دیا ہے۔

ذرائع کے مطابق، دریائے چناب میں ہیڈ محمد والا پر پانی کی سطح بڑھ کر 413.15 فٹ تک جا پہنچی ہے، جبکہ کریٹیکل سطح 417 فٹ ہے۔

دوسری جانب، شیر شاہ کے مقام پر پانی کی سطح 393 فٹ ہو چکی ہے، اور خطرہ لمحہ بہ لمحہ بڑھتا جا رہا ہے۔

مزید تشویشناک بات یہ ہے کہ پانچ لاکھ 43 ہزار کیوسک پر مشتمل دوسرا بڑا سیلابی ریلا آئندہ 36 گھنٹوں میں ملتان میں داخل ہونے والا ہے، جو نشیبی علاقوں کو بری طرح متاثر کر سکتا ہے۔

محکمہ آبپاشی کے مطابق، شیر شاہ بند میں جان بوجھ کر شگاف ڈالنے کا مقصد سیلابی دباؤ کم کرنا ہے، لیکن اس اقدام کے نتیجے میں شیر شاہ، گاگرا کچور، وال وٹ موڑ اور موضع ہمڑ جیسے مواضعات شدید متاثر ہوں گے، جہاں سیلابی پانی تیزی سے داخل ہونے کا خدشہ ہے۔

مقامی حکام کے مطابق شیر شاہ بند کو توڑنے کے حوالے سے عوام کی آگاہی کے لئے اعلانات کیے جا رہے ہیں جس میں بتایا جا رہا ہے کہ ایک گھنٹے بعد شیر شاہ بند توڑا جائے گا اور علاقہ مکین فوری طور پر اپنے بچوں سمیت محفوظ مقام پر منتقل ہونے کی ہدایت کی جا رہی ہے۔

ریسکیو ادارے الرٹ پر ہیں، جب کہ پاک فوج اور سول انتظامیہ نے ممکنہ ہنگامی صورتحال سے نمٹنے کے لیے حکمت عملی مرتب کر لی ہے۔